សង្វៀន Mas Fight Cambodia ប្រកាសបើកការប្រកួតដណ្ដើមខ្សែក្រវាត់ IPCC KUN KHMER រដូវកាលទី២ ទម្ងន់ ៦០គីឡូក្រាមប្រជុំដោយជើងខ្លាំង ៨រូបចាប់ផ្ដើមប្រកួតសន្សំពិន្ទុបានមួយសប្ដាហ៍ហើយ។
លោក Tommy Kim
លោក Tommy Kim តំណាង IPCC ប្រចាំកម្ពុជា និងជាទីប្រឹក្សាស្ថានីយទូរទស្សន៍ថោន បានឲ្យដឹងក្នុងសន្និសីទសារព័ត៌មានល្ងាចមិញនេះថា Mas Fight Cambodia គឺផ្ដល់ឱកាសដល់កីឡាករមួយចំនួនដែលមិនទាន់មានខ្សែក្រវាត់ផង និងជាការផ្ដល់ឱកាសដល់ក្លឹបចំនួន ៨ផ្សេងៗគ្នាបានបញ្ជូនកីឡាករឆ្នើមរបស់ខ្លួនដើម្បីប្រជែងគ្នាផង។
ទិដ្ឋភាពសន្នីសីទសារព័ត៌មាន
កេរ្តិ៍ឈ្មោះ ប្រាក់រង្វាន់ និងឱកាស នៅពេលនេះសង្វៀន Mas Fight ផ្ដល់ឲ្យកីឡាករទាំង៨រូបនេះហើយ ដូច្នេះសូមត្រៀមខ្លួនឲ្យបានល្អទាំងការហ្វឹកហាត់ និងការគោរពនូវលក្ខន្តិកៈជាដើមត្រូវយកចិត្តទុកដាក់អនុវត្តន៍ឲ្យបានត្រឹមត្រូវ។
ទិដ្ឋភាពសន្នីសីទសារព័ត៌មាន
តំណាង IPCC ប្រចាំកម្ពុជារូបនេះមិនភ្លេចអរគុណឡើយចំពោះការចូលរួមអភិវឌ្ឍន៍វិស័យប្រដាល់ និងការចំណាយថវិការាប់លានដុល្លាររបស់ក្រុមKhmer Beverages សហការជាមួយស្ថានីយទូរទស្សន៍ថោនលើកស្ទួយគុនខ្មែរជាច្រើនឆ្នាំមកនេះ។ លោកជូនពរដល់ក្រុមហ៊ុនជីបម៉ុង រឹតតែទទួលបានអតិថិជនកាន់តែច្រើន និងជោគជ័យកាន់តែខ្លាំងថែមទៀតដើម្បីបន្តជួយគុនខ្មែរផងដែរ។
ទិដ្ឋភាពសន្នីសីទសារព័ត៌មាន
បញ្ជាក់ដែរថា សន្និសីទសារព័ត៌មានប្រកាសបើកការប្រកួតខ្សែក្រវាត់ IPCC KUN KHMER រដូវកាលទី២ នេះនៅល្ងាចថ្ងៃទី១៩ ខែមេសា ឆ្នាំ២០២៥ នៅផ្សារទំនើបជីបម៉ុង ២៧១ ក្រោមអធិបតីភាពលោកឧកញ៉ា លាង ម៉េង ឯកឧត្តម វ៉ា សុធា លោក Tommy Kim។ បេក្ខភាពទាំងដណ្ដើមខ្សែក្រវាត់ទាំង៨រូបរួមមាន មាស ណាឃីម សែម ចាន់រិទ្ធីស័ក្ត ណង សៅ សូត្រ សុខឃីម គង់ ហូវ បញ្ញា ហយហាក់ ប៉ែន កាក់រាជសីហ៍ សេក គឹមសាន្ត។ ការប្រកួតចាប់ពីថ្ងៃទី២០ ខែមេសា ឆ្នាំ២០២៥ រៀងរាល់ថ្ងៃអាទិត្យ ចាប់ពីម៉ោង ៣រសៀលនៅសង្វៀនថោន៕
