ដើម្បីសម្រិតសម្រាំងកីឡាករ-កីឡាការិនីឆ្នើមៗ ត្រៀមចូលរួមប្រកួតកីឡាសាកលវិទ្យាល័យអាស៊ាន លើកទី២២ នាចុងឆ្នាំ២០២៦ នៅប្រទេសម៉ាឡេស៊ី សហព័ន្ធកីឡាបញ្ចស៊ីឡាត់កម្ពុជាបានប្រកាសរៀបចំការប្រកួតកីឡាបញ្ចស៊ីឡាត់ជ្រើសរើសជើងឯកថ្នាក់ជាតិ លើកទី២ រយៈពេល២ថ្ងៃ គឺថ្ងៃទី១៤-១៥ ខែមីនា ឆ្នាំ២០២៦ នៅសាលសាកលវិទ្យាល័យភូមិន្ទភ្នំពេញ ។
បើតាមលោក អ៊ួ តារា អគ្គលេខាធិការ សហព័ន្ធកីឡាគុនបញ្ចស៊ីឡាត់កម្ពុជាលើកឡើងថា ជើងឯកថ្នាក់ជាតិនេះត្រូវបានធ្វើឡើងក្រោមការចង្អុលបង្ហាញរបស់ឯកឧត្តម សេង ធារិន ប្រធានសហព័ន្ធកីឡាបញ្ចស៊ីឡាត់កម្ពុជា ក៏ដូចជាការចូលរួមពីសំណាក់លោកអនុប្រធាន និងសមាជិកប្រតិបត្តិសហព័ន្ធបានជំរុញឱ្យខានតែបានសម្រាប់រៀបចំការប្រកួតជើងឯកថ្នាក់ជាតិដើម្បីជាការបោះជំហានថ្មីមួយទៀត ក្នុងការប្រមូលផ្តុំអត្តពលិក និងផ្សព្វផ្សាយកីឡាបញ្ចស៊ីឡាត់ឱ្យកាន់តែសុះសាយនៅប្រទេសកម្ពុជា។
នេះជាឆ្នាំទី២ហើយដែលសហព័ន្ធរៀបចំការប្រកួតជើងឯកថ្នាក់ជាតិ ដោយសារឆ្នាំទី១ គណៈកម្មាការ រៀបចំការប្រកួតទទួលបានការចូលរួមចុះឈ្មោះពីចំនួន២២ សាលាគុន មកពី៩ រាជធានីខេត្ត ដោយមានអត្តពលិកចូលរួម ១២៧នាក់ ក្នុងនោះកីឡាករ ៨៦នាក់ និងកីឡាការិនី ៤១នាក់ ព្រមទាំងមានប្រតិភូគ្រូបង្វឹក ៣០នាក់ មន្ត្រីបច្ចេកទេស៣០នាក់ ក្រុមការងារទទួលបន្ទុកការអនុគណៈកម្មាការនីមួយៗចំនួន២៥នាក់។ នេះបើតាមការបញ្ជាក់របស់លោកអគ្គលេខាធិការ។
ចំណុចសំខាន់ក្នុងការប្រកួតនេះ សម្រិតសម្រាំងរកធនធានកីឡាករ កីឡាការិនីឆ្នើមៗដើម្បីត្រៀមខ្លួនចូលរួមក្នុងព្រឹត្តិការណ៍ការប្រកួតកីឡាសាកលវិទ្យាល័យអាស៊ានលើកទី២២ (The 22 ASEAN University Games) ឆ្នាំ២០២៦ នៅប្រទេសម៉ាឡេស៊ី ដែលគ្រោងនឹងរៀបចំពីថ្ងៃទី១០-១៩ ខែធ្នូ ឆ្នាំ២០២៦ នៅប្រទេសម៉ាឡេស៊ី និង ការប្រកួតកម្រិតអន្តរជាតិផ្សេងៗទៀត។ រំលឹកដែរថា កីឡាករ កីឡាការិនី របស់សហព័ន្ធកីឡាបញ្ចស៊ីឡាត់កម្ពុជា ធ្លាប់បានឈ្នះមេដាយគ្រប់កម្រិត ពិសេសថ្មីៗនេះឈ្នះមេដាយពីការប្រកួតកីឡាសិស្សអាស៊ានលើកទី១៤ នៅប៊្រុយណេ ២គ្រឿង និងឈ្នះមេដាយសំរឹទ្ធិ ពីការប្រកួតកីឡាយុវជនអាស៊ីមកពីប្រទេសបារ៉ែន ១គ្រឿងផងដែរ៕
