ឆ្លងកាត់ការប្រកួតពេញរយៈពេល២ថ្ងៃ នៃព្រឹត្តការណ៍ប្រកួតកីឡាចំបាប់យុវជនជ្រើសរើសជើងឯកថ្នាក់ជាតិ ប្រចាំឆ្នាំ២០២៥ សហព័ន្ធបានរកឃើញយុវជនថ្នាលមានសមត្ថភាពដែលជាការគិតបន្ថែមពីសហព័ន្ធអាចយកមកបណ្តុះបណ្តាលចូលក្នុងក្រុមជម្រើសជាតិបាន។
ថ្លែងឲ្យដឹងក្នុងពិធីបិទជាផ្លូវការ កាលពីរសៀលថ្ងៃទី៦មេសា លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា តំណាងឯកឧត្តម វ៉ាត់ ចំរើន ប្រធានសហព័ន្ធបានលើកឡើងថា កម្មវិធីនេះត្រូវបានធ្វើឡើងក្នុងគោលបំណងដើម្បីអភិវឌ្ឍន៍កីឡាចំបាប់កម្ពុជាឱ្យដូចបណ្តាលប្រទេសនានា ក្នុងការបង្កើតឱកាសឱ្យយុវវ័យបង្ហាញនូវសមត្ថភាពអន្តរជាតិពិតប្រាកដ និងជំរុញលើកទឹកចិត្តឱ្យយុវវ័យចេះហ្វឹកហាត់កីឡាជាសុខភាព និងជំនាញ។
អនុប្រធានចំបាប់ខាងលើបានបង្ហាញអារម្មណ៍រីករាយ ដោយការរៀបចំលើកទី២នេះ មានកីឡាករ កីឡាការិនី ចូលរួមច្រើន ជាពិសេសមកពីតាមបណ្តាខេត្តនានា ដោយពួកគេមានភាពប៉ិនប្រសប់ក្នុងការប្រកួតប្រជែង។ កត្តានេះឆ្លងកាត់ការប្រកួតរួចរាល់ ធ្វើឲ្យសហព័ន្ធសម្លឹងឃើញ មានកីឡាករ កីឡាការិនី ដែលមានសមត្ថភាព ដើម្បីអាចជ្រើសរើសមកហ្វឹកហាត់បន្ថែម ចូលរួមជាជម្រើសជាតិថ្នាលនាពេលខាងមុខ។
គួរបញ្ជាក់ថា ការប្រកួតកីឡាចំបាប់ជ្រើសរើសជើងឯកថ្នាក់ជាតិប្រចាំឆ្នាំ២០២៥ នេះមានសមាគម ក្លឹប ប្រតិភូ និងកីឡាករ កីឡាការិនី ចូលរួមចំនួន១៧ក្លឹបសរុបមានចំនួន ១៩៥នាក់ ក្នុងនោះប្រតិភូ គ្រូបង្វឹក ៣៤នាក់ កីឡាករ ១០៨ នាក់ កីឡាការិនី ៥៣នាក់។ការរៀបចំប្រកួតនេះ ទទួលបានការឧបត្ថម្ភគាំទ្រពីវិទ្យាស្ថានខេមអេដ (CamEd Business School) និងសហការឧបត្ថម្ភដោយ The Beach កសិដ្ឋានអមរៈ និងSephora Sport Center។
ជាលទ្ធផលជ័យលាភីចំណាត់ថ្នាក់ រួមមាន៖ ចំណាត់ថ្នាក់លេខ១ ក្លឹបកីឡាចំបាប់ព្រះធាតុខេត្តពោធិ៍សាត់ ឈ្នះមេដាយមាស ៣ និងមេដាយសំរឹទ្ធ១, ចំណាត់ថ្នាក់លេខ២ ក្លឹប Kiri Jiu-Jutsu Wrestling មេដាយមាស២ ប្រាក់២ ខណៈលេខ៣ បានទៅលើក្លឹបខេមអេដ (CamEd Wrestling) មេដាយមាស១ ប្រាក់២ និងសំរឹទ្ធ២។ក្រៅតែពីក្លឹបដែលរៀបរាប់នេះ នៅមានក្លឹបជាច្រើនទៀតបានស្វែងរកមេដាយជូនក្លឹប រាងៗខ្លួន ខណៈក្លឹបខ្លះក៍ត្រូវខិតខំបន្ថែមទៀត ដើម្បីមានឧកាសនៅក្នុងការដណ្តើមេដាយជាបន្តទៀតផងដែរ៕
