ដើម្បីបង្កើននូវភាពយកចិត្តទុកដាក់ ដល់អត្តពលិកចំណុះឲ្យសហព័ន្ធនិងដើម្បីអភិវឌ្ឍន៍ វិស័យកីឡាហាប់គីដូ ឲ្យកាន់តែរីកចម្រើន បន្ថែមទៀត កាលពីរសៀលថ្ងៃទី៦មេសាឆ្នាំ២០២៥ម្សិលមិញ សហព័ន្ធបានរៀបចំកម្មវិធីប្រឡងឡើងខ្សែ ក្រវាត់ជូនកីឡាករ-កីឡាការិនី ដែលពួកគេបានខិតខំហ្វឹកហាត់ជាច្រើនឆ្នាំកន្លងមក។
លោក គួច ហុង ជៀក អនុប្រធានស្តីទីតំណាងឲ្យ លោកឧកញ៉ា សៅ សេងហាក់ ប្រធានសហព័ន្ធកីឡាហាប់គីដូកម្ពុជា បានបញ្ជាក់ថា សកម្មភាពដែលយើងកំពុងតែធ្វើបាពេលនេះ ជាផែនការ មេ របស់សហព័ន្ធ ដើម្បីសម្រួចទិសដៅអភិវឌ្ឍន៍ វិស័យកីឡាហាប់គីដូ ឲ្យកាន់តែរីកចម្រើន បន្ថែមទៀត និងជំរុញឲ្យមានវគ្គបណ្តុះបណ្តាលកីឡាករ-កីឡាការិនី ឲ្យខិតខំហ្វឹកហាត់បង្កើន បច្ចេកទេស ដើម្បីអភិវឌ្ឍន៍សមត្ថភាព ឲ្យកាន់តែល្អប្រសើរ ក្នុងការទទួលបាន ឱកាសក្លាយជាគ្រូបង្គោល នាថ្ងៃអនាគត ។
លោកបានបន្តថា បច្ចុប្បន្នសហព័ន្ធខ្វះការឧបត្ថម្ភ សម្រាប់រៀបចំការប្រកួតកីឡាហាប់គីដូជ្រើសរើស ជើងឯកប្រចាំឆ្នាំរបស់ខ្លួន រៀបចំវគ្គបណ្តុះបណ្តាល ដើម្បីពង្រឹកសមត្ថភាព អាជ្ញាកណ្តាល និងចៅក្រម និងវគ្គបណ្តុះបណ្តាលគ្រូបង្វឹក ក្នុងពង្រីកក្លិប តាមបណ្តាលខេត្តនានា ក្នុងប្រទេសកម្ពុជា ។ហេតុនេះយើងសូមសំណូមពរដល់សប្បុរសជនទាំងអស់ ដែលចង់ចូលរួមឧបតម្ភ សូមចូលរួមជាមួយសហព័ន្ធ ដោយពួកយើងនឹងខិតខំប្រឹងប្រែង ឲ្យអស់សមត្ថភាពក្នុង ការបង្កើតក្លិប និងវគ្គបណ្តុះបណ្តាល ដើម្បីឲ្យមានធនធាន កីឡាករកីឡាការិនី កាន់តែច្រើនទៀត។
បើតាមលោក គង់ ចាន់ធីណា អគ្គលេខាធិការ សហព័ន្ធខ្មែរកីឡាហាប់គីដូ និងជាគ្រូបង្វឹកបាននិយាយថា ការខិតខំប្រឹងប្រែងហ្វឹកហាត់ របស់ក្រុមកីឡាករ-កីឡាការិនី ដែលបានចូលរួមវគ្គបណ្តុះបណ្តាល បច្ចេកទេសកីឡាហាប់គីដូនៃកម្រិតនីមួយៗបានបញ្ចប់ទៅតាមកាលកំណត់ ហើយសិស្សគុនឆ្លងកាត់ការហ្វឹកហាត់រយៈពេលត្រូវប្រឡងបញ្ចប់កម្រិតខ្សែក្រវ៉ាត់។ជាលទ្ធផលនាពេលនេះគឺមាន៣ប្រភេទដោយក្នុងនោះ សហព័ន្ធបានប្រគល់លិខិតបញ្ជាក់ ខ្សែក្រវ៉ាត់បៃតង ចំនួន១០នាក់ , វិញ្ញាបនបត្រខ្សែរក្រវ៉ាត់ពណ៍ត្នោតចំនួន៥នាក់ និង សញ្ញាប័ត្រខ្មៅកម្រិត១ដាន់ជូនដល់អត្តពលិក ចំនួន៥នាក់ផថែមទៀត។
បន្ថែមពីលើកម្មវិធីតម្លើងខ្សែរក្រវ៉ាត់នេះ សហព័ន្ធខ្មែរកីឡាហាប់គីដូក៍បាន រៀបចំកម្មវិធីសង្រ្កានដល់កីឡាករ កីឡាការិនីទាំងអស់ចូលរួមលេងកម្សាន្តដើម្បីអបអរពិធីបុណ្យចូលឆ្នាំប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធសករាជ ២៥៦៩ខាងមុខនេះផងដែរ៕
