ក្រោមការផ្តួចផ្តើមរៀបចំព្រឹត្តិការណ៍ប្រកួតបាល់ទាត់ វិលជុំ ដែលកើតចេញពីកិច្ចសហការរវាងក្រុមហ៊ុនធានារ៉ាប់រងអាយុជីវិត និងសុខភាព អេ អាយ អេ ខេមបូឌា និងអង្គការផ្កាយសមុទ្រ បានបញ្ចប់បេសកម្មមួយខេត្តទៀតហើយ ដោយគោលបំណងផ្តោតសំខាន់លើសុខភាព ការអប់រំ សមភាពយេនឌ័រ និង ជំនាញបំណិនជីវិត តាមរយៈកីឡា ។
នាថ្ងៃអាទិត្យទី៦មេសាឆ្នាំ២០២៥ ព្រឹត្តិការណ៍ប្រកួតបាល់ទាត់វិលជុំកុមារ និងយុវជន AIA-ISF Youth League ប្រចាំខេត្តបន្ទាយមានជ័យបានបិទញ្ចប់ទៅប្រកបដោយភាពសប្បាយរីករាយ និងអស្ចារ្យបំផុត ។ ព្រឹត្តិការណ៍មួយនេះមិនត្រឹម តែបង្ហាញពីភាពស្វាហាប់ និងឆន្ទៈរបស់កីឡាករកីឡាការនីម្នាក់ៗប៉ុណ្ណោះទេ តែថែមទាំងបានផ្តល់បទ ពិសោធន៍កីឡាល្អៗដល់ក្រុមបាល់ទាត់ ៣០ក្រុមដែលបានចំណាយពេលវេលាជាច្រើនសប្តាហ៍ហ្វឹកហាត់ អភិវឌ្ឍសមត្ថភាព ភាពជឿជាក់ និងស្មារតីសាមគ្គីភាព តាមរយៈកីឡាទៀតផង ។
ដោយមានការចូលរួមពីសាលារៀន អង្គការដៃគូ កុមារ និងយុវជនដែលជួបប្រទះការខ្វះខាត ព្រឹត្តិការណ៍ ប្រកួតបាល់ទាត់វិលជុំកុមារ និងយុវជន AIA-ISF Youth League នេះដើរតួយ៉ាងសំខាន់រួមចំណែកដល់ការ អភិវឌ្ឍសមត្ថភាព និងការចូលរួមរបស់យុវជនទូទាំងខេត្ត ។
ថ្លែងនាឧកាសនោះ លោក Greg Preston ប្រធានគ្រប់គ្រងកម្មវិធីបាល់ទាត់របស់អង្គការ ផ្កាយសមុទ្របានមានប្រសាសន៍ថា៖ “ការប្រកួតវិលជុំរដូវកាលនេះពិតជាអស្ចារ្យ ដោយពួកយើងបានឃើញ ពីភាពរីកចម្រើន និងឆន្ទៈដ៏ជ្រាលជ្រៅរបស់កីឡាករកីឡាការនីម្នាក់ៗចាប់តាំងពីចាប់ផ្តើមលេងបាល់ទាត់ ដំបូងរហូតដល់បានក្លាយជាកីឡាករកីឡាការនីក្នុងការប្រកួតវិលជុំនេះ ។ អង្គការផ្កាយសមុទ្រពិតជាមាន មោទនភាពចំពោះភាពរីកចម្រើនរបស់ពួកគេទាំងនៅក្នុង និងក្រៅទីលាន ។”
ជាមួយគ្នានេះផងដែរ ព្រឹត្តិការណ៍បិទការប្រកួតវិលជុំកុមារ និងយុវជន AIA-ISF Youth League នេះគឺជាការថ្លែងអំណរគុណយ៉ាងធំធេងចំពោះការខិតខំប្រឹងប្រែងរបស់គ្រូបង្វឹក អាជ្ញាកណ្តាល ឪពុកម្តាយ និងអ្នកចូលរួមគាំទ្រលើកទឹកចិត្ត ដែលបានធ្វើឲ្យកម្មវិធីនេះអាចដំណើរការទៅបានយ៉ាងរលូន ។
កត់សំគាល់ដែរថា ព្រឹត្តិការណ៍ប្រកួតបាល់ទាត់វិលជុំកុមារនិងយុវជន AIA–ISF Youth League ប្រចាំខេត្តបន្ទាយមាន ជ័យគឺមានអត្ថន័យលើសពីការប្រកួតដណ្តើមយកពានរង្វាន់ ហើយវាគឺជាការអបអរសាទរ និងបំផុសទឹក ចិត្តពីសមិទ្ធផលសម្រេចបាន ការតស៊ូ និងភាពសប្បាយរីករាយ ។ ឪពុកម្តាយ និងអ្នកចូលរួមគាំទ្រ ទទួលបានភាពសប្បាយរីករាយពីការទស្សនាការប្រកួតយ៉ាងស្វិតស្វាញរបស់កីឡាករកីឡាការនីទៅតាម ប្រភេទអាយុផ្សេងៗ និងមានមោទនភាពចំពោះកូនៗរបស់ពួកគាត់ ដែលបានទទួលមេដាយ និងពានរង្វាន់ ។ ក្រុមជើងខ្លាំងពីការប្រកួតវិលជុំប្រចាំខេត្តបន្ទាយមានជ័យនឹងទៅចូលរួមប្រកួតវគ្គផ្តាច់ព្រ័ត្រ AIA–ISF Grand Championship League ដ៏ធំនៅរាជធានីភ្នំពេញ ៕
