Chelsea ជាក្លិបតែមួយគត់ នៅក្នុងក្របខណ្ឌ Premier League ដែលនឹងប្រកួតដោយគ្មានស្លាកអ្នកឧបត្ថម្ភធំនៅលើអាវនៅរដូវកាលថ្មី ២០២៥-២៦។
ការគ្មានស្លាកសញ្ញាក្រុមហ៊ុនឧបត្ថម្ភធំលើអាវ Chelsea ព្រោះពួកគេ ចង់បានដៃគូរយៈពេលវែង មិនមែន ២ ឬ ៣ឆ្នាំទេ និងចង់ទទួលបានប្រាក់ឧបត្ថម្ភធំពី ៨១លាន ទៅ ៨៨លានដុល្លារ។
បែបនេះក្តី វាបានធ្វើអោយក្រុមហ៊ុនធំៗនានា ប្រជែងគ្នាដើម្បីអាចក្លាយជាដៃគូជាមួយនឹងក្លិបតោខៀវសម្រាប់រដូវកាលថ្មី។ ក្នុងចំណោមក្រុមហ៊ុនធំៗទាំងនោះ ក្រុមហ៊ុន Riyadh Air អាកាសចរដ៏ធំរបស់អារ៉ាប៊ីសាអូឌីត កំពុងតែក្លាយជាអ្នកឈានមុខគេ ដើម្បីសហការជាមួយនឹងក្លិប Chelsea។ Chelsea កំពុងទទួលការចាប់អារម្មណ៍ខ្លាំង ក្រោយមានកៅអីលេង UEFA Champions League និងឈ្នះពាន FIFA Club World Cup ឆ្នាំ ២០២៥។
នៅរដូវកាលថ្មី ២០២៥-២៦ ក្លិប Premier League ចំនួន ១១ បានក្លាយជាដៃគូសហការជាមួយនឹងក្រុមហ៊ុនល្បែងភ្នាល់ ខណៈក្លិបធំៗដូចជា Arsenal, Man City, Man UTD, Liverpool, Tottenham Hotspur គ្មានដៃគូឧបត្ថម្ភជាក្រុមហ៊ុនល្បែងភ្នាល់ទេ។ យ៉ាងណា ក្រោយចប់រដូវកាល ២០២៥-២៦ Premier League នឹងហាមឃាត់មិនឲ្យមានដាក់ស្លាកសញ្ញាដៃគូឧបត្ថម្ភជាក្រុមហ៊ុនល្បែងភ្នាល់លើអាវកីឡាករទៀតទេ៕
