ឯកឧត្ដម ហង់ជួន ណារ៉ុន ប្រធានខេមរសហព័ន្ធកីឡាតេក្វាន់ដូ WT បញ្ជាក់ថាការប្រកួតតេក្វាន់ដូពានរង្វាន់ឯកអគ្គរដ្ឋទូតសាធារណរដ្ឋកូរ៉េ ប្រចាំឆ្នាំ២០២៥ “KOREAN AMBASSADOR’S CUP TAEKWONDO COMPETITION 2025 ជាការផ្ដល់ឱកាសមួយដ៏ល្អដល់កីឡាករ កីឡាការិនីបានបញ្ចេញទេពកោសល្យដែលខ្លួនមានដល់មហាជន និងគ្រូៗបានឃើញ។
ឯកឧត្ដម ហង់ជួន ណារ៉ុន បានមានប្រសាសន៍ថា ការប្រកួតប្រចាំឆ្នាំនេះមិនត្រឹមតែជាឱកាសធ្វើការវាស់ស្ទង់វាយតម្លៃកម្រិតបច្ចេកទេសបន្ថែម ដើម្បីស្វែងរកគ្រូបង្វឹក និងកីឡាករ-កីឡាការិនីវ័យក្មេងឆ្នើមៗលើប្រភេទកីឡាតេក្វាន់ដូ។
វេទិការនេះបង្ហាញសមត្ថភាពសំដៅលើកទឹកចិត្តដល់ក្រុមកីឡាតេក្វាន់ដូកម្ពុជាផងដែរ និងបានរួមចំណែកយ៉ាងសំខាន់ដល់ការលើកកម្ពស់កិច្ចសហប្រតិបត្តិការ និងការរឹតចំណងមិត្តភាព និងការផ្លាស់ប្តូរវប្បធម៌រវាងប្រទេសកម្ពុជា-កូរ៉េ។
ការប្រកួតនេះបានផ្តល់ឱកាសដល់ក្រុមកីឡាតេក្វាន់ដូ WT មកពីតំណាងក្លឹបរាជធានី-ខេត្ត អាចបញ្ចេញសមត្ថភាព ទេពកោសល្យ បច្ចេកទេស និងផ្សព្វផ្សាយក្បាច់គុនដល់សាធារណជន ដើម្បីត្រៀមខ្លួនឆ្ពោះទៅការប្រកួតកីឡាយុវជនអាស៊ីលើកទី៥ (5th Asian Youth Games) ឆ្នាំ២០២៩ ដែលកម្ពុជាទទួលធ្វើជាម្ចាស់ផ្ទះខាងមុខ។
ដូចនេះ សូមកីឡាករ កីឡាការិនីទាំងអស់បន្តខិតខំតាំងចិត្តប្រកបដោយភាពមោះមុត និងប្រកាន់ខ្ជាប់នូវវិន័យក្នុងការហ្វឹកហាត់ឲ្យបានល្អ ដើម្បីនាំកិត្តិយស និងមោទនភាពជូនជាតិនាពេលខាងមុខ។
បញ្ជាក់ដែរថា ការប្រកួតតេក្វាន់ដូពានរង្វាន់ឯកអគ្គរដ្ឋទូតសាធារណរដ្ឋកូរ៉េ ប្រចាំឆ្នាំ២០២៥ “KOREAN AMBASSADOR’S CUP TAEKWONDO COMPETITION 2025 បានធ្វើឡើងកាលពីថ្ងៃទី១២ ខែកញ្ញា ឆ្នាំ២០២៥ នៅសាលប៊ូយ៉ុង ក្នុងពហុកីឡដ្ឋានជាតិ។ ការប្រកួតនេះមានប្រតិភូគ្រូបង្វឹក កីឡាករ កីឡាការិនីសរុប ១៥០នាក់(នារី ១២៦នាក់) និងមានក្លឹបចូលរួមសរុប ២២ក្លឹបមកពីរាជធានី-ខេត្ត៕
