អ្នកជំនាញខាងផ្នែកកីឡា និងជាថ្នាកដឹកនាំយ៉ាងសកម្ម លោក វាត់ ចំរើន បញ្ជាក់ពីថាវិស័យអប់រំកាយ និងកីឡា ជាវិស័យមួយដែលជាអតិភាព និងមានការយកចិត្តទុកដាក់ជំរុញអភិវឌ្ឍន៍ជាខ្លាំងពីរដ្ឋាភិបាល។
លោក វាត់ ចំរើន មានប្រសាសន៍ក្នុងកិច្ចប្រជុំបូកសរុបការងារ និងពិនិត្យវាយតម្លៃសមិទ្ធផលលើវិស័យអប់រំកាយរយៈពេលមួយឆ្នាំកន្លងមកនេះថា ក្រសួងបានសម្រេចលទ្ធផលមួយចំនួនដូចជា ការប្រកួតកីឡាសិស្សបឋមសិក្សា និងមធ្យមសិក្សាថ្នាក់ជាតិ ការប្រកួតកីឡាតាមសហព័ន្ធជាតិ ការប្រកួតកីឡាលក្ខណៈអន្តរជាតិ ក្នុងប្រទេស និងក្រៅប្រទេស ការលើកកម្ពស់កីឡាករ ការលើកកម្ពស់សម្មភាពរៀន និងបង្រៀនអប់រំកាយក្នុងម៉ោងសិក្សា ២ម៉ោងក្នុងមួយសប្តាហ៍ និងហ្វឹកហាត់កីឡានៅក្រៅម៉ោងសិក្សា ការអភិវឌ្ឍសមត្ថភាពមន្ត្រីអប់រំកាយ និងកីឡា ការអភិវឌ្ឍហេដ្ឋារចនាសម្ព័ន្ធរូបវន្តកីឡា ការរៀបចំទិវាកីឡាអាស៊ាន និងកីឡាដើម្បីទាំងអស់គ្នា ការផ្តល់ថវិកា គាំទ្រដល់សហព័ន្ធជាតិចំនួន៥១ ការបណ្តុះបណ្តាលគ្រូអប់រំកាយ និងកីឡា និងការកសាងលិខិតបទដ្ឋានផ្សេងៗសម្រាប់វិស័យអប់រំកាយ និងកីឡា។ ទាំងនេះជាគួរមោទនៈសម្រាប់ទាំងអស់គ្នាដែលជាថ្នាក់ដឹកនាំមន្ត្រីកីឡា និងអ្នកចូលរួមលើកស្ទួយវិស័យកីឡាទាំងអស់។
អ្នកជំនាញផ្នែកកីឡាខាងលើបន្ថែមពីនេះទៀតថា ដើម្បីជាការធ្វើកំណែទម្រង់នេះទទួលបានជោគជ័យ និងពន្លឿនការអភិវឌ្ឍអនុវិស័យអប់រំកាយ និងកីឡា ក្រសួងអប់រំ យុវជន និងកីឡាសំណូមពរដល់អង្គការរដ្ឋ និងអង្គការសង្គមកីឡា អង្គការដៃគូ និងអង្គការឯកជនឱ្យខិតខំប្រឹងប្រែងរួមគ្នាបន្ថែមទៀត យកអស់កម្លាំងកាយ កម្លាំងចិត្ត និងលទ្ធភាពបំពេញភារកិច្ចទៅតាមតួនាទីរៀងៗខ្លួន ដោយការទទួលខុសត្រូវខ្ពស់ ។ ជាពិសេស សមាជិក សមាជិកា នៃកិច្ចប្រជុំបូកសរុបការងារអនុវិស័យ អប់រំកាយ និងកីឡាផ្តល់ធាតុចូលលើប្រធានបទទាំងពីរ សម្រាប់ដាក់ក្នុងសន្និបាតអប់រំ យុវជន និងកីឡានាពេលខាងមុខ និងដាក់ចេញជាទិសដៅសម្រាប់អនុវត្តឆ្នាំ២០២៦។ ខ្ញុំក៏សូមអំពាវនាវផងដែរ ដល់វិស័យឯកជន សប្បុរសជន និងប្រជាជនចូលរួមឧបត្ថម្ភគាំទ្រជាស្មារតី សម្ភារ ឬថវិកា ដើម្បីចូលរួមចំណែកអភិវឌ្ឍវិស័យកីឡាជាតិយើង។
រំលឹកដែរថា កិច្ចប្រជុំបូកសរុបការងារ និងវាយតម្លៃលើសមិទ្ធផលការងារដែលបានសម្រេចរយៈពេលមួយឆ្នាំកន្លងមកនេះធ្វើឡើងរយៈពេល ២ថ្ងៃគឺចាប់ពីថ្ងៃទី៣ ដល់ ៤ ខែធ្នូ ឆ្នាំ២០២៥នៅសាលាប្រជុំទន្លេបាសាក់ II រាជធានីភ្នំពេញ។ កិច្ចប្រជុំនេះបានការអញ្ជើញចូលរួមពីលោក វាត់ ចំរើន រដ្ឋលេខាធិការក្រសួងអប់រំ តំណាង ឯកឧត្តមបណ្ឌិតសភាចារ្យ ហង់
ជួនណារ៉ុង ឧបនាយករដ្ឋមន្ត្រី ជាគណៈអធិបតី លោក កែ ប៊ុនខៀង រដ្ឋលេខាធិការក្រសួងអប់រំ និងតំណាងគណៈកម្មាធិការជាតិអូឡាំពិកកម្ពុជា គណៈកម្មាធិការជាតិប៉ារ៉ា-ឡាំពិកកម្ពុជា និងសហព័ន្ធកីឡាជាតិ មន្ទីរអប់រំ យុវជន និងកីឡារាជធានី-ខេត្ត អង្គការដៃគូជាច្រើនផងដែរ៕
