ការប្រកួតប៊ូល និងប៉េតង់កម្ពុជា ជ្រើសរើសជើងឯកថ្នាក់ជាតិ ឆ្នាំ២០២៥ បានចាប់ផ្តើមជាផ្លូវការហើយនាព្រឹក ថ្ងៃទី២៨មករាឆ្នាំ២០២៦នេះ ដែលធ្វើឡើងរយៈពេល៣ថ្ងៃ ដើម្បី ថ្ងៃ ជាឱកាសសម្រាប់សម្លឹងមើលធនធានថ្មីបំពេញបន្ថែមក្នុងក្រុមជម្រើសជាត។
មានប្រសាសន៍ក្នុងពិធីបើកជាផ្លូវការ ឯកឧត្តម សុខ សូកាន រដ្ឋលេខាធិការក្រសួងរៀបចំដែលដី នគររូបនីយ៍កម្ម និង សំណង់ និងជាប្រធានសហព័ន្ធកីឡាប៊ូលនិង ប៉េតង់កម្ពុជា បានលើកឡើងថា ការប្រកួតនេះរៀបចំឡើងក្នុងគោលបំណងលើកស្ទួយវិស័យកីឡាមួយនេះឲ្យរឹតតែមានការគាំទ្រពីមហាជន និងជាការបង្កើនទំនាក់ទំនងរវាងសម្ព័ន្ធ ក្លឹប រាជធានីខេត្តទាំងអស់។
លើសពីនេះក៏ជាការផ្ដល់ឱកាសដល់កីឡាករ កីឡាការិនីទូទាំងប្រទេសបានប្រកួតដុសខាតសមត្ថភាពផងដែរ។ថ្នាក់ដឹកនាំសហព័ន្ធខាងលើបន្តទៀតថា ការប្រកួតនេះក៏ជាពេលវេលាល្អមួយសម្រាប់សហព័ន្ធបានសម្លឹងរកមើលនូវធនធានដែលមានសមត្ថភាពលេចធ្លោផងដែរដើម្បីអាចតេស្តចូលហ្វឹកហាត់ជាមួយក្រុមជម្រើសជាតិឈានទៅដល់ការប្រកួតតំណាងប្រទេសលើឆាកអន្តរជាតិ។
ឯកឧត្តម បន្តថា ការប្រកួតពី១ឆ្នាំទៅមួយឆ្នាំកីឡាករ កីឡាការិនីកាន់តែមានការរីកចម្រើនអភិវឌ្ឃន៍គួរកត់សំគាល់ ហើយការដាក់ចេញនូវវិញ្ញាសានៃការប្រកួតកាន់តែសម្បូរបែប ធ្វើឲ្យការចូលរួមកាន់តែទូលំទូលាយ។
គួរកត់សំគាល់ដែរថាសក្តានុពលរបស់កម្ពុជា លើវិស័យកីឡាប៊ូល និងប៉េតង់ ត្រូវបានទទួលស្គាល់ទាំងកម្រិតតំបន់ និង ពិភពលោក ព្រមទាំងត្រូវបានសហព័ន្ធកីឡាប៊ូល និង ប៉េតង់អន្តរជាតិ ប្រសិទ្ធនាមកម្ពុជាថា ជាប្រទេសមហាអំណាចលើវិស័យកីឡាប៉េតង់ នេះគឺជាមោទនភាពសម្រាប់ប្រជាជនកម្ពុជា ទាំងមូល។ គិតត្រឹមខែមករានៃឆ្នាំ២០២៦នេះ មេដាយសរុបដែលកម្ពុជា ដណ្តើមបានចំនួន៤២៧គ្រឿង ក្នុងនោះមានមាស១២២គ្រឿង ប្រាក់១៤៨គ្រឿង និង សំរឹទ្ធិ១៥៧គ្រឿង។
បន្ថែមពីនេះកាលពីឆ្នាំ២០១៧សហព័ន្ធកីឡាប៊ូល និង ប៉េតង់អន្តរជាតិ ក៍បានសម្រេចផ្តល់ពានរង្វាន់ ចំណាត់លេខ១ដល់សហព័ន្ធកីឡាប៊ូលនិង ប៉េតង់កម្ពុជា ដែលមានស្នាដៃ និងការដឹកនាំល្អជាងគេនៅទូទាំងពិភពលោក។
បញ្ជាក់ដែរថា ការប្រកួតជ្រើសរើសជើងឯកថ្នាក់ជាតិ ឆ្នាំ២០២៥ របស់សហព័ន្ធកីឡាប៊ូល និងប៉េតង់កម្ពុជា នេះធ្វើឡើងរយៈពេល ៣ថ្ងៃចាប់ពីថ្ងៃទី២៨ ដល់ ៣០ ខែមករា ឆ្នាំ២០២៦ នៅទីលានរបស់សហព័ន្ធក្នុងពហុកីឡសដ្ឋានជាតិ។ដោយមានសម្ព័ន្ធក្លឹបចូលរួមចំនួន៦០ មានប្រតិភូគ្រូបង្វឹក កីឡាករ កីឡាការិនី ចំនួន៤១៦នាក់ប្រកួតលើ៨វិញ្ញាសា៕
