មុនមួយថ្ងៃនៃពិធីបិទជាផ្លូវការព្រឹត្តការណ៍សិស្សបឋមថ្នាក់ជាតិ ការប្រកួតកីឡាហែលទឹក ដែលជាកីឡាមួយប្រភេទ មាននៅក្នុងព្រឹត្តិការណ៍ការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ដែរនោះ ក៍បានរកឃើញម្ចាស់ជ័យលាភីរបស់ខ្លួន លើវិញ្ញាសាទាំង៨ផងដែរ។
ក្នុងពិធីបិទជាផ្លូវការ កាលពីថ្ងៃចុងសប្តាហ៍មិនេះ លោក នាង សុរិទ្ធិយ៉ា អគ្គលេខាធិការងសហព័ន្ធខ្មែរហែលទឹក បានប្រាប់ឲ្យដឹងថា ក្រសួងអប់រំ យុវជន និងកីឡា បានរៀបចំឡើងនូវព្រឹត្តិការណ៍ប្រកួតកីឡា “សិស្សបឋម សិក្សាជើងឯកថ្នាក់ជាតិ” ឆ្នាំ២០២៦ ដែលប្រព្រឹត្តទៅចាប់ពីថ្ងៃទី១ ដល់ថ្ងៃទី៩ ខែឧសភា ឆ្នាំ ២០២៦ នៅរាជធានីភ្នំពេញ ។ សម្រាប់ការប្រកួតប្រភេទកីឡាហែលទឹក ក៏ត្រូវបានអនុញ្ញាតឲ្យចូលរួមប្រកួតផងដែរ ចាប់ផ្តើមនាថ្ងៃទី៨ ខែឧសភា ឆ្នាំ២០២៦ នៅអាងហែលទឹកនៃពហុ កីឡដ្ឋានជាតិ ។
ឆ្នាំនេះមានការចូលរួម ពីរាជធានី ខេត្តចំនួន ៧ ដូចជា៖ រាជធានីភ្នំពេញ ខេត្តបាត់ដំបង ខេត្ត កណ្តាល ខេត្តកំពង់ចាម ខេត្តព្រៃវែង ខេត្តស្ទឹងត្រែង និង ខេត្តបន្ទាយមានជ័យ មានកីឡាករ កីឡាការិនីចូលរួមសរុបចំនួន ២៧នាក់ (ប្រុស ១៦នាក់ ស្រី ១១នាក់) គ្រូបង្វឹក គ្រូជំនួយចំនួន ១៤នាក់ នឹងមន្ត្រីគណៈកម្មការបច្ចេកទេសចំនួន ២៥នាក់ ចូលរួមដឹកនាំកាត់ សេចក្តីក្នុងការប្រកួត ។ មានវិញ្ញាសាសរុបចំនួន ៨ (កីឡាករ ៤វិញ្ញាសា និងកីឡាការិនី ៤វិញ្ញសា)ដាក់ឲ្យប្រកួតប្រជែង។
លោក ហែម គីរី អគ្គលេខាធិការ បានមានប្រសាសន៍ថា អ្វីដែលសហព័ន្ធខ្មែរកីឡាហែលទឹក ផ្តោតសំខាន់ គឺឱកាសចូលរួមកីឡាករ កីឡាការិនីវ័យក្មេង ជាពិសេសស្សានុសិស្សសិក្សានៅតាមវិទ្យាល័យទូទាំងប្រទេសកម្ពុជា ។
កម្មវិធីនេះបានបង្ហាញពីស្មារតីកីឡា ការគោរពវិន័យ ភាពអង់អាចក្លាហាន និងសាមគ្គីភាពរវាងបេក្ខភាពដែលជាសិស្សបឋមមកពីបណ្តារាជធានី ខេត្តដែលចូលរួម។ ការប្រកួតកីឡាហែលទឹកនេះ មិនត្រឹមតែជាការប្រកួតប្រជែងដើម្បីទទួលបានជ័យលាភីប៉ុណ្ណោះទេ ប៉ុន្តែថែមទាំងជាការលើកស្ទួយវិស័យកីឡា បណ្តុះស្មារតីរឹងមាំ ការអត់ធ្មត់ និងការគោរពច្បាប់ផងដែរ។ វាជាវេទិកាដ៏សំខាន់មួយសម្រាប់កុមារា និងកុមារីក្នុងការបង្ហាញសមត្ថភាព និងអភិវឌ្ឍខ្លួនឯង។
សម្រាប់លទ្ធផលចំណាត់ថ្នាក់លេខ១ បានលើខេត្តព្រៃវែង ឈ្នះមេដាយសរុប ៦គ្រឿង មាស២ ប្រាក់៣ សំរឹទ្ធ១។ លេខ២ បានលើរាជធានីភ្នំពេញ ឈ្នះមេដាយសរុប ៤គ្រឿង មាស២ ប្រាក់២។ លេខ៣ បានលើខេត្តកណ្ដាល ឈ្នះមេដាយសរុប ៣គ្រឿង មាស២ សំរឹទ្ធ១៕
