ទិវាកីឡាអាស៊ាន ឬហៅថា ASEAN Sports Day ដែលរៀបចំឡើងនៅក្នុងពហុកីឡដ្ឋានជាតិកាលពីថ្ងៃទី២២ ខែសីហា ឆ្នាំ២០២៥ មានការចូលរួមពីអ្នកកីឡា និងមហាជនសរុបជាង ៥០០នាក់ប្រកបដោយភាពរីករាយ។
ឯកឧត្តម កែ ប៊ុនខៀង រដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា ការរៀបចំទិវាកីឡាអាស៊ាន ដែលនឹងកំពុងប្រារព្ធនាពេលនេះក្នុងគោលបំណង រំលឹកដល់ថ្ងៃបង្កើតសហគមន៍អាស៊ាន និងលើកកម្ពស់សកម្មភាពកីឡារបស់សហគមន៍អាស៊ាន។
លើសពីនេះគឺជាការផ្សព្វផ្សាយបំផុសឱ្យប្រជាជន នៃបណ្តាប្រទេសសមាជិកអាស៊ានចូលរួមលើកកម្ពស់របៀបរស់នៅប្រកបដោយសុខភាពល្អ ដើម្បីលើកកម្ពស់អត្តសញ្ញាណជាតិនៅក្នុងតំបន់ និងពិភពលោក រួមចំណែកអភិវឌ្ឍសង្គមជាតិ។
អ្នកចូលរួមទាំងអស់បង្ហាញទឹកមុខញញឹមរីករាយជាខ្លាំង និងបានហាត់តាមប្រភេទកីឡានានាដែលខាងកម្មវិធីបានរៀបចំមកយ៉ាងសកម្មប្រកបដោយភាពស្និតស្នាល និងសាមគ្គីភាពគ្នាផងដែរ។
រំលឹកដែរថា ទិវាកីឡាអាស៊ាន “ ASEAN Sports Day រៀបចំឡើងដោយនាយកដ្ឋានកីឡាជំនាញ និងកីឡាមហាជន នៃក្រសួងអប់រំ យុវជន និងកីឡា។ អ្នកចូលរួមមកពីបណ្ដាសហព័ន្ធកីឡាជាតិ គ្រូបង្វឹក កីឡាករ រួមនិងមន្ត្រីក្រសួងអប់រំ និងមហាជនសរុបជាង ៥០០នាក់នៅក្នុងពហុកីឡដ្ឋានជាតិ៕
