ក្រោមកញ្ចប់ថវិកាគាំទ្រប្រចាំឆ្នាំរបស់ក្រសួងអប់រំ យុវជន និងកីឡា សហព័ន្ធកីឡាវាយកូនឃ្លីលើតុកម្ពុជាបានរៀបចំវគ្គ គ្រូបង្វឹកកីឡាវាយកូនឃ្លីលើតុកម្រិតមូលដ្ឋានដែលមានរយៈពេល ៥ ថ្ងៃចាប់ពីថ្ងៃទី២៧ ដល់ថ្ងៃទី៣១ ខែសីហា ឆ្នាំ២០២៥ នៅសាលសហព័ន្ធកីឡាវាយកូនឃ្លីលើតុកម្ពុជាស្ថិតក្នុងពហុកីឡដ្ឋានជាតិអូឡាំពិក ដល់សិក្ខាកាមចំនួន២២នាក់ នាព្រឹកថ្ងៃទី២៧សីហាឆ្នាំ២០២៥។
លោក ហេង សុខជាតិ អគ្គលេខធិការស្តីទីសហព័ន្ធកីឡាវាយកូនឃ្លីលើតុកម្ពុជា បានប្រាប់ឲ្យដឹងថា វគ្គនេះយើងរៀនទាំងទ្រឹស្ដី និងការអនុវត្តនៅលើទីលាន ដើម្បីទទួលនូវចំណេះដឹងនិងបទពិសោធន៍ សម្រាប់យកទៅធ្វើការបណ្ដុះបណ្ដាល ហ្វឹកហាត់ដល់សិស្សានុសិស្ស កីឡាករ-កីឡាការិនី ទៅតាមសាលារៀន អង្គភាព សហគមរបស់ខ្លួនឲ្យកាន់តែរីកចម្រើនបន្ថែមទៀត ។ វគ្គនេះបញ្ជ្រាបនូវចំណេះដឹងកីឡាវាយកូនឃ្លីលើតុតាមរយៈការបណ្ដុះបណ្ដាលគ្រូបង្វឹកកម្រិតមូលដ្ឋានទូទាំងប្រទេស នឹងបានដឹងពីប្រវត្តិនៃកីឡាវាយកូនឃ្លីលើតុអន្តរជាតិនិងជាតិ ក៍ដូចជាច្បាប់នៃការប្រកួត។
លោកបញ្ជាក់ថា ជាមួយនឹងគោលបំណងសើម្បីបណ្ដុះកីឡាករក្មេងៗនៅតាមបណ្ដាសាលានោះសហព័ន្ធក៏ត្រូវការស្វែងរកក្មេងៗជំនាន់ក្រោយឲ្យបានច្រើនដើម្បីជាថ្នាលសម្រាប់បន្តវេន ព្រោះកីឡាមិនអាចគ្មានអ្នកបន្តវេន ។
អ្វីដែលគួរឲ្យកត់សំគាល់ កីឡាវាយកូនឃ្លីលើតុគឺជាប្រភេទកីឡាម្យ៉ាងដែលទាមទារឲ្យអត្តពលិកមិនត្រឹមតែមានភាពរហ័សរហួនតែចលនាប៉ុណ្ណោះទេតែត្រូវរហ័សទាំភ្នែក មានភាពវាងវៃព្រមទាំងស្គាល់នូវអត្តចរឹកគូប្រកួតទៀតផង ។
បើទោះបីជានេះជាវគ្គមូលដ្ឋានមែន តែនៅពេលបញ្ចប់វគ្គសិក្ខាកាមទាំងអស់សុទ្ធតែបានទទួលនូវវិញ្ញាបនប័ត្រដែលបញ្ជាក់ពីការចូលរួម មួយវិញទៀតពួកគេអាចមានឧិកាសដើម្បីពង្រីកសមត្ថភាពដើម្បីបន្តទីសិក្សានៅវគ្គដែលមានកម្រិតខ្ពស់ៗជាងនេះបានតទៀតផងដែរ ៕
