វគ្គសិក្ខាសាលារយៈពេល០២ថ្ងៃស្តីការរៀបចំទ្រឹស្ដី ផែនការហាត់ហ្វឹកហ្វឺន ដើម្បីពង្រឹងសមត្ថភាពគ្រូបង្វឹក គ្រូជំនួយក្រុមកីឡាថ្នាល និងក្រុមកីឡាជម្រើសជាតិ ឆ្នាំ២០២៦ បានបិទបញ្ចប់ដោយជោគជ័យ កាលពីល្ងាចថ្ងៃទី០២ ខែមិថុនា ឆ្នាំ២០២៦ ។
ឯកឧត្តម ប៊ូ ជុំសេរី បានកោតសរសើរ និងវាយតម្លៃខ្ពស់ចំពោះការខិតខំក្រេបយកចំណេះដឹងរបស់សិក្ខាមទាំងពីគ្រូឧទ្ទេសប្រចាំវគ្គជាច្រើនរូប។ ឯកឧត្តមក៏បានវាយតម្លៃខ្ពស់ចំពោះមជ្ឈមណ្ឌលជាតិហ្វឹកហ្វឺនកីឡា ដែលបានរៀបចំវគ្គនេះឡើង ដើម្បីពង្រឹងគុណភាពរបស់គ្រូបង្វឹក គ្រូជំនួយ ក្នុងការបង្វឹកដល់កីឡាករ កីឡាការិនីជម្រើសជាតិ ត្រៀមការប្រកួតអន្តរជាតិធំៗ នាពេលខាងមុខជាបន្តបន្ទាប់។
លោក យាន គីស៊ីវត្ថា ប្រធានមជ្ឈមណ្ឌលជាតិហ្វឹកហ្វឺនកីឡាបានជម្រាបជូនថា វគ្គសិក្ខាសាលានេះ ផ្តោតសំខាន់លើការចែករំលែកចំណេះដឹងនៃចិត្តសាស្ត្រកីឡា ការព្យាបាលដោយចលនា និងស្តារយុវនិតិសម្បទា ការផ្សព្វផ្សាយឯកសារគតិយុត្ត ការរៀបចំទ្រឹស្តី និងផែនការហាត់ហ្វឹកហ្វឺន ការសង្គ្រោះបឋម ព្រមទាំងចែករំលែកពីមេរៀននៃផលវិបាកនៃការប្រើប្រាស់សារធាតុហាមឃាត់ ក្នុងវិស័យកីឡា (ដូប៉ា ឬដូពីង) ផងដែរ។
គោលបំណង គឺដើម្បីពង្រឹងបន្ថែមពីលើចំណេះដឹង និងចែករំលែកបទពិសោធន៍ ក្នុងការរៀបចំកម្មវិធីហ្វឹកហាត់ ប្រចាំថ្ងៃ ប្រចាំសប្ដាហ៍ និងផែនការណ៍ហាត់ហ្វឹកហ្វឺន ក្នុងនាមជាគ្រូបង្វឹក ដោយមិនមែនត្រឹមតែជាអ្នករៀបចំផែនការបង្ហាត់ប៉ុណ្ណោះទេ ប៉ុន្តែថែមទាំងត្រូវយល់ដឹងច្បាស់លាស់លើជំនាញរបស់ខ្លួន វិធីសាស្ត្របង្ហាត់ របបអាហារូបត្ថមកីឡា ផ្នែកចិត្តសាស្ត្រកីឡា ផ្នែកសង្គ្រោះបឋម ផ្នែកទំនាក់ទំនង និងការប្រើប្រាស់ថ្នាំផ្សេងៗ ដែលអាចធ្វើឱ្យមានការប៉ះពាល់ដល់ការហ្វឹកហាត់ និងការប្រកួតជាដើម៕
