សហព័ន្ធកីឡាកាយវប្បកម្ម និងលំហាត់ប្រាណកម្ពុជាបានប្រកាសផ្សព្វផ្សាយជាសាធារណៈអំពីសារាចរជូនសមាជិកទាំងអស់ នៅទូទាំងពិភពលោកឱ្យប្រយ័ត្នជនខិលខួច យកឈ្មោះសហព័ន្ធអន្តរជាតិធ្វើសកម្មភាពបោកប្រាស់។
យោងតាមសហព័ន្ធកីឡាកាយវប្បកម្ម និងលំហាត់ប្រាណកម្ពុជា ដែលមានលោក តឹក ប៊ុនវី ជាប្រធានសហព័ន្ធបានឱ្យដឹងថា សហព័ន្ធកីឡាកាយវប្បកម្ម និងលំហាត់ប្រាណពិភពលោក (WBPF) បានផ្ញើសារាចរ ដើម្បីសារក្រើនរំឭកជាផ្លូវការមួយជូនចំពោះបណ្តាសហព័ន្ធជាតិសមាជិកទាំងអស់ ដើម្បីវៀរចាកពីការចងសម្ព័ន្ធភាពជាមួយនឹងអង្គការស្ថាប័នអន្តរជាតិ ឬសាកលគ្មានច្បាប់អនុញ្ញាតត្រឹមត្រូវ និងកំពុងធ្វើជាតំណាងឱ្យវិស័យកីឡាកាយវប្បកម្ម និងលំហាត់ប្រាណពិភពលោកប្រព្រឹត្តិខុសច្បាប់កីឡា។
សហព័ន្ធកីឡាកាយវប្បកម្ម និងលំហាត់ប្រាណពិភពលោក (WBPF) បានចាត់ទុកសកម្មភាពអសកម្មទាំងនោះថា ជាទង្វើមួយដែលមិនអាចទទួលយកបានឡើយ ហើយផ្ទុយទៅនឹងគោលការណ៍របស់សហព័ន្ធកីឡាកាយវប្បកម្ម និងលំហាត់ប្រាណពិភពលោក (WBPF)។
លើសពីនេះ សហព័ន្ធសមាជិករបស់ WBPF មិនត្រូវបានអនុញ្ញាតឱ្យចូលរួមជាមួយនឹងស្ថាប័នអន្តរជាតិទាំងឡាយ ដែលបានធ្វើការប្រកាសដោយខ្លួនឯង ព្រោះស្ថាប័នទាំងនេះជាធម្មតា គឺជាស្ថាប័នខុសច្បាប់កំពុងព្យាយាមស្នើសុំការអនុញ្ញាត និងការគាំទពីរដ្ឋាភិបាល ដើម្បីបន្តសកម្មភាពបោកប្រាស់ជារឿយៗតែងទាញយកប្រយោជន៍ ពីកេរ្តិ៍ឈ្មោះរបស់អង្គការស្ថាប័នត្រូវបានគេទទួលស្គាល់។
ក្នុងនាមសហព័ន្ធកីឡាកាយវប្បកម្ម និងលំហាត់ប្រាណពិភពលោកបានណែនាំដល់បណ្តាសហព័ន្ធជាសមាជិកមេត្តាជ្រាបថា ក្លឹបកីឡាកាយវប្បកម្ម និងលំហាត់ប្រាណទាំងឡាយជាសមាជិកជាមួយខ្លួនត្រូវបានហាមឃាត់មិនឱ្យចូលរួមក្នុងការប្រកួតដែលរៀបចំឡើងដោយស្ថាប័នខុសច្បាប់ ដែលមិនរងការដាក់ទណ្ឌកម្ម ដោយមានប្រសិទ្ធភាពអនុវត្តភ្លាមៗ។
យើងទទួលបានដំណឹងថា មានករណីមន្ត្រី និងអត្តពលិកបានចូលរួមក្នុងព្រឹត្តិការណ៍គ្មានការទទួលស្គាល់ នេះ គឺជាការបំពានយ៉ាងច្បាស់លើបទប្បញ្ញត្តិរបស់ WBPF។សហព័ន្ធកីឡាកាយវប្បកម្ម និងលំហាត់ប្រាណពិភពលោក និងសហព័ន្ធកីឡាកាយវប្បកម្ម និងលំហាត់ប្រាណកម្ពុជា ព្រមទាំងសហព័ន្ធកីឡាកាយវប្បកម្មទូទាំងពិភពលោក សព្វថ្ងៃកំពុងប្រយុទ្ធប្រឆាំងនឹងប្រើប្រាស់សារធាតុហាមឃាត់ក្នុងវិស័យកីឡា (Doping) យ៉ាងខ្លាំងក្លា ដើម្បីជំរុញឱ្យវិស័យកីឡាមួយនេះនៅទូទាំងពិភពលោកស្អាតស្អំ ការប្រកួតប្រជែងប្រកបដោយកម្លាំងពិត ស្មារតីពិត និងយុត្តិធម៌៕
