ឯកឧត្តម កែ ប៊ុនខៀង ប្រធានសហព័ន្ធកីឡាសិស្សនិស្សិតកម្ពុជាបានស្នើឱ្យគ្រឹះស្ថានឧត្តមសិក្សា និងមធ្យមសិក្សាបច្ចេកទេសទាំងអស់រួមគ្នាជួយពង្រឹង និងពង្រីកនូវកត្តាសំខាន់ៗមួយចំនួនឆ្ពោះត្រៀមការប្រកួតសំខាន់ៗខាងមុខ។
ប្រធានសហព័ន្ធកីឡាសិស្សនិស្សិតក ឯកឧត្តម កែ ប៊ុនខៀង មានប្រសាសន៍ថា កម្ពុជានឹងធ្វើជាម្ចាស់ផ្ទះនូវព្រឹត្តិការណ៍ដ៏មហាអស្ចារ្យ និងជាប្រវត្តិសាស្រ្ត និងដើម្បីពន្លឿនការអភិវឌ្ឍសហព័ន្ធកីឡាសិស្សនិស្សិតកម្ពុជាឱ្យឆ្លើយតបទៅនឹងផែនការអភិវឌ្ឍរបស់ក្រសួងអប់រំ ស្នើគ្រឹះស្ថានឧត្តមសិក្សា និងមធ្យមសិក្សាទាំងអស់ចូលរួមអនុវត្តនូវទិសដៅ ពង្រឹង និងពង្រីកសមាគមកីឡាសមាគមកីឡានិស្សិត តាមគ្រឹះស្ថានឧត្តមសិក្សា និងមធ្យមសិក្សាចូលជាសមាជិកសហព័ន្ធកីឡាសិស្ស និស្សិតកម្ពុជាឱ្យបានច្រើនបន្ថែមទៀត។
ស្នើគ្រឹះស្ថានឧត្តមសិក្សា និងមធ្យមសិក្សាបច្ចេកទេសយកចិត្តទុកដាក់ និងជំរុញសមាគមកីឡានិស្សិត ធ្វើសកម្មភាពហាត់ហ្វឹកហ្វឺនកីឡាក្រៅម៉ោងសិក្សា និងការប្រកួតកីឡាឱ្យបានផុលផុស ឆ្លើយតបទៅនឹងគោលការណ៍ណែនាំរបស់ក្រសួងអប់រំ យុវជន និងកីឡា។ គ្រឹះស្ថានឧត្តមសិក្សា និងមធ្យមសិក្សាបច្ចេកទេស ពង្រឹងការជ្រើសរើសកីឡាករ កីឡាការិនី ទៅចូលរួមការប្រកួតកីឡាសិស្ស និងនិស្សិតឱ្យបានសមស្របតាមគោលការណ៍បច្ចេកទេស។
ឯកឧត្តមរដ្ឋលេខាធិការបន្ថែមថា សហការជាមួយសហព័ន្ធកីឡាជាតិបើកវគ្គបណ្តុះបណ្តាលមន្រ្តីជំនាញនៅតាមគ្រឹះស្ថានសិក្សា។ កៀរគរសប្បុរសជន និងដៃគូឯកជនចូលរួមឧបត្ថម្ភគាំទ្រសកម្មភាពកីឡានិស្សិត និងអភិវឌ្ឍហេដ្ឋារចនាសម្ព័ន្ធកីឡា នៅតាមគ្រឹះស្ថានឧត្តមសិក្សា។ ពង្រឹងគុណភាព និងប្រសិទ្ធភាពនៃការប្រកួតកីឡាសាកលវិទ្យាល័យថ្នាក់ជាតិ។ លើកទឹកចិត្តដល់គ្រឹះស្ថានឧត្តមសិក្សា និងមធ្យមសិក្សាបច្ចេកទេសដែលធ្វើសកម្មភាពកីឡាសកម្ម និងជ្រើសរើសអត្តពលិកនិស្សិតឆ្នើមឱ្យទៅចូលរួមការប្រកួតកីឡាសាកល វិទ្យាល័យជាលក្ខណៈអន្តរជាតិ។
បញ្ជាក់ដែរថា សហព័ន្ធកីឡាសិស្ស-និស្សិតកម្ពុជា បានបិទបញ្ចប់វគ្គបណ្ដុះបណ្ដាលរដ្ឋបាលកីឡាក្រោយសិក្សាអស់រយៈពេល ៤ថ្ងៃចចាប់ពីថ្ងៃទី១៧ ខែកញ្ញា ឆ្នាំ២០២៥ ដល ២០ ខែកញ្ញា ឆ្នាំ២០២៥។ វគ្គបណ្ដុះបណ្ដាលនេះគឺពង្រឹងសមត្ថភាពមន្ត្រី និងការរៀបចំដំណើរការប្រកួតព្រឹត្តិការណ៍តូច-ធំ៕
