សហព័ន្ធតេក្វាន់ដូ WT វគ្គបណ្ដុះបណ្ដាលគ្រូៗបង្វឹកដែលមានរយៈពេល ៥ថ្ងៃនេះគឺបានជួយពង្រឹងសមត្ថភាព និងបច្ចេកទេសថ្មីៗជំរុញដល់ការផ្សព្វផ្សាយមានកាន់តែខ្លាំងនៅតាមបណ្ដាមូលដ្ឋានរៀងៗខ្លួន។
អគ្គលេខាធិការរងសហព័ន្ធតេក្វាន់ដូ WT លោក គង់ សក្ខិដា ថ្លែងអំណរគុណក្រសួងអប់រំ យុវជន និងកីឡា គណៈកម្មាធិការប្រតិបត្តិ ដែលបានរៀបចំវគ្គបណ្ដុះបណ្ដាលគ្រូបង្វឹកកម្រិតមូលដ្ឋានរយៈពេល៥ថ្ងៃកន្លងទៅនេះ។
វគ្គបណ្ដុះបណ្ដាលនេះបានជួយពង្រឹងសមត្ថភាព និងបច្ចេកទេសបង្ហាត់សិស្សកាន់តែល្អប្រសើរ និងប្រកបដោយគុណភាពបន្ថែមទៀត។ គ្រូៗដែលជាសិក្ខាកាមនឹងបានយកនូវបច្ចេកទេសទាំងនេះទៅអនុវត្តន៍ក្នុងការបង្ហាត់បង្រៀន និងជួយពង្រីកផ្សព្វផ្សាយកីឡាតេក្វាន់ដូ WT នេះកាន់តែមានភាពល្បីល្បាញជាងនេះទៅទៀត។
បញ្ជាក់ដែរថា វគ្គបណ្ដុះបណ្ដាលគ្រូបង្វឹកកម្រិតមូលដ្ឋានដែលរៀបចំឡើងដោយសហព័ន្ធតេក្វាន់ដូ WT នេះធ្វើឡើងរយៈ ៥ថ្ងៃចាប់ពីថ្ងៃទី២៩ កញ្ញា ដល់ ៣ តុលា ឆ្នាំ២០២៥ នៅជាន់ទី៣ អគារហ្វឹកហ្វឺនកីឡា។ សិក្ខាកាមចូលរួមមានសរុប ៣២នាក់ (ស្រី១១) មកពីបណ្ដាក្លឹបរាជធានី-ខេត្ត៕
