អង្គការ Happy Football Cambodia Australia (HFCA) បានសម្រេចក្ដីបំណងរបស់កុមារក្រីក្រចំនួន ៦៤នាក់ពិសេសអ្នកដែលរស់នៅឯខេត្តសៀមរាបពុំធ្លាប់ស្គាល់ពហុកីឡដ្ឋានមរតកតេជោដ៏ស្រស់ស្អាតនាឱកាសប្រារព្ធខួបលើកទី២០ កាលពីថ្ងៃទី១៦ ខែវិច្ឆិកា ឆ្នាំ២០២៥ នេះ។
ទិដ្ឋភាពប្រារព្ធខួប២០ឆ្នាំ
លោក Paraic Grogan ស្ថាបនិកអង្គការ HFCA បានឲ្យដឹងក្រោយបញ្ចប់ការប្រកួតមិត្តភាពថា ខួបលើកទី២០ នេះគឺប្រារព្ធឡើងក្នុងគោលបំណងបង្កើតអនុស្សាវរីយ៍ដ៏សប្បាយរីករាយជាមួយគ្នាមិនថាកុមារក្រីក្រដែលអង្គការជួយទាំងនោះទេ ពោលមានទាំងបណ្ដាអង្គការដែលបានសហការគ្នាធ្វើលើកិច្ចការមនុស្សធម៌កន្លងមកផងដែរ។
ទិដ្ឋភាពប្រារព្ធខួប២០ឆ្នាំ
កុមារទាំង ៦៤នាក់ដែលបានមកចូលរួមកម្មវិធីនេះមិនថាអ្នកនៅរាជធានីភ្នំពេញ ឬមកពីខេត្តសៀមរាបនោះទេនាឱកាលនេះបានមកទស្សនាព្រះបរមរាជវាំង និងកម្សាន្តកន្លែងសំខាន់ៗមួយចំនួនទៀត។ កាន់តែអស្ចាចារ្យ និងជាការសម្រេចក្ដីស្រមៃរបស់កុមារទាំងនោះគឺបានមកឃើញពហុកីឡដ្ឋានមរតកតេជោដ៏ល្អស្រស់ស្អាត និងទំនើបដោយផ្ទាល់ភ្នែក។ បន្ថែមពីនេះក៏មានឱកាលល្អបានលេងបាល់ទាត់នៅលើទីលានកម្រិតអន្តរជាតិមួយនេះទៀតផង។
ទិដ្ឋភាពប្រារព្ធខួប២០ឆ្នាំ
ម្នាក់ៗបានប្រកួតបាល់ដោយស្នាមញញឹម និងបង្ហាញពីភាពក្លាហានប្រកបដោយទំនុកចិត្ត និងក្ដីសង្ឃឹមក្នុងជីវិតតាមរយៈការទទួលបាននូវការបណ្ដុះបណ្ដាល ភាពកក់ក្ដៅដែលផ្ដល់ដោយអង្គការ HFCA អស់រយៈពេល ២០ឆ្នាំមកនេះ។
ស្ថាបនិកខាងលើបន្តទៀតថា គោលដៅបន្ទាប់ទៀតនោះអង្គការ HFCA នឹងជួយដល់កុមារក្រីក្រនានានៅកម្ពុជាឲ្យបានដល់ ១ម៉ឺននាក់តាមរយៈការលើកកម្ពស់ដល់ជីវភាពរស់នៅ ការសិក្សា និងផ្លាស់ប្ដូរផ្នត់គំនិតអភិវឌ្ឍន៍ខ្លួនជាមួយវិស័យកីឡាបាល់ទាត់។
ទិដ្ឋភាពប្រារព្ធខួប២០ឆ្នាំ
លោក Paraic Grogan បានថ្លែងអំណរគុណដល់បណ្ដាអង្គការដៃគូសហការអង្គការមូលនិធិកុមារកម្ពុជា អង្គការ Build your Future Today (BFT) និងបណ្ដាអង្គការមួយចំនួនទៀតដែលបានរួមការងារជាមួយគ្នារយៈពេល ២០ឆ្នាំមកនេះលើបេសកកម្មជួយកុមារក្រីក្រកម្ពុជាតាមរយៈបាល់ទាត់៕
ទិដ្ឋភាពប្រារព្ធខួប២០ឆ្នាំ
