អង្គការផ្កាយសមុទ្របានរៀបចំ ការប្រកួតបាល់ទាត់សមត្ថភាពចម្រុះលើកទី១៦ ប្រចាំឆ្នាំដែលបាន ប្រព្រឹត្តិទៅកាលពី ចុងសប្តាហ៍មកនេះ នៅទីលានបាល់ទាត់អង្គការផ្កាយសមុទ្រ នៅរាជធានីភ្នំពេញ ។
កម្មវិធីបាល់ទាត់នេះមានគោលបំណងសំខាន់គឺចូលរួមអបអរសាទរ និងលើកកម្ពស់ការចូលរួមកីឡាករកីឡាការនីមានពិការភាពនៅកម្ពុជា ។ ដោយកីឡាករកីឡាការនីចូលរួមក្នុងការ ប្រកួតបាល់ទាត់នេះធ្វើដំណើរមកពីខេត្តចំនួន ៣ មានដូចជា៖ ខេត្តកំពង់ចាម ខេត្តបាត់ដំបង និងខេត្តកំពត តាមរយៈអង្គការដៃគូរបស់អង្គការផ្កាយសមុទ្រដូចជា៖ កម្មវិធីអភិវឌ្ឍន៍មនុស្សថ្លង់ និងអង្គការ Epic Arts ជាដើម ។
ក្នុងឆ្នាំនេះ ជាផ្នែកមួយនៃសកម្មភាពបាល់ទាត់សមត្ថភាពចម្រុះ របស់កម្មវិធីបាល់ទាត់អង្គការផ្កាយសមុទ្រ កីឡាករថ្លង់បានចូលរួមវគ្គបណ្តុះបណ្តាលបាល់ទាត់ ជាមួយនឹងកីឡាករជិះរទេះ កីឡាករពិការសតិបញ្ញា និងកីឡាករមានផ្ទុកមេរោគអេដស៍ទៀតផង ។ នៅកម្ពុជាឱកាសសម្រាប់អ្នកមានពិការភាពក្នុងការចូលរួមប្រកួតប្រជែងក្នុងវិស័យកីឡាគឺកម្រណាស់ ហើយអង្គការផ្កាយសមុទ្រក៏កំពុងតែខិតខំធ្វើការផ្លាស់ប្តូរទស្សនៈនេះ ។
កម្មវិធីប្រកួតបាល់ទាត់សមត្ថភាពចម្រុះឆ្នាំនេះបានទទួលស្វាគមន៍ កីឡាករកីឡាការនីសរុប ចំនួន ៣៤៨ នាក់ មកពីសហគមន៍អ្នកមានពិការភាពសតិបញ្ញា អ្នកមានផ្ទុកមេរោគអេដស៍ និងអ្នកថ្លង់ ជាដើម ដែលនេះបានសបញ្ជាក់ថាបាល់ទាត់គឺសម្រាប់អ្នកគ្រប់គ្នា ។
ត្រឹមតែជាការប្រកួតបាល់ទាត់សាមញ្ញមួយដែលចាប់់ផ្តើមកាលពីដប់ឆ្នាំមុនឥឡូវនេះបានរីកលូតលាស់ទៅជាកម្មវិធីប្រកួតកីឡា ដែលជួយលើកកម្ពស់ការចូលរួមសម្រាប់ជនមានពិការភាពដ៏ធំ ដោយបាននាំ យកឱកាសជាច្រើនដល់កុមារ និងយុវជន ដែលមួយចំនួនមិនត្រូវបានគេរាប់បញ្ចូលក្នុងសកម្មភាព កីឡា ។
កម្មវិធីប្រកួតនេះបានចាប់ផ្តើមនៅម៉ោង ៨:០០ ព្រឹក និងប្រព្រឹត្តទៅពេញមួយថ្ងៃ ដោយមានការប្រកួត មិត្តភាព សកម្មភាពលើកកម្ពស់ការចូលរួមរបស់សហគមន៍ពោរពេញដោយបរិយាកាសសប្បាយ រីករាយ ដែលភាពខុសគ្នារបស់កីឡាករកីឡាការនីគ្រប់រូបត្រូវបានរាប់បញ្ចូលទាំងក្នុង និងក្រៅទីលាន ។
កីឡាករកីឡាការនីចូលរួមប្រកួតទទួលបានពានរង្វាន់ មេដាយ និងរង្វាន់លើកទឹកចិត្តពិសេសៗ ជាច្រើន ដែលមិនត្រឹមតែបង្ហាញពីការទទួលស្គាល់ពីសមត្ថភាពកីឡារបស់ពួកគេទេ ថែមទាំងចំពោះ ទឹកចិត្តស្រឡាញ់កីឡា ការសាមគ្គីគ្នាជាក្រុម និងភាពតស៊ូធន់ទ្រាំទៀតផង ។
ការរៀបចំកម្មវិធីប្រកួតបាល់ទាត់សមត្ថភាពចម្រុះរបស់អង្គការផ្កាយសមុទ្រលើកទី១៦នេះជាថ្មីម្តងទៀតបាន បង្ហាញថានៅពេលកុមារ និងយុវជនទទួលបានឱកាសក្នុងការចូលរួមនោះពួកគេកំពុងតែដើរឆ្ពោះទៅ រកភាពរីកចម្រើន ទាំងលើទីលាន និងក្នុងជីវិត ។ កម្មវិធីគឺជាការក្រើនរម្លឹកថា បាល់ទាត់មិនមែន គ្រាន់តែកីឡាប៉ុណ្ណោះទេ ប៉ុន្តែវាជាមធ្យោបាយដ៏សំខាន់ក្នុងការលើកកម្ពស់សិទ្ធិ ការកសាងមិត្តភាព និងសាមគ្គីភាពផងដែរ ៕
