នៅថ្ងៃទី៤ ខែធ្នូ ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងពិធីបិទសិក្ខាសាលាបូកសរុបលទ្ធផលការងារអនុវិស័យអប់រំកាយ និងកីឡា ឆ្នាំ២០២៥ និងលើកទិសដៅឆ្នាំ ២០២៦ ។
សកម្មភាពពិធីបិទ
លោក ប៉ុន សុខ អគ្គនាយក នៃអគ្គនាយកដ្ឋានកីឡា បានឡើងថា សិក្ខាសាលាបូកសរុបការងារអនុវិស័យអប់រំកាយ និងកីឡា ដែលរៀបចំដោយអគ្គនាយកដ្ឋានកីឡានៃក្រសួងអប់រំ យុវជន និងកីឡា មានរយៈពេល ២ថ្ងៃដែលប្រព្រឹត្តទៅចាប់ពីថ្ងៃទី៣ ដល់ថ្ងៃទី៤ ខែធ្នូ ឆ្នាំ២០២៥ មានសិក្ខាកាមចូលរួមមកពីបណ្តាមន្ទីរអប់រំ យុជន និងកីឡារាជធានី ខេត្ត គណៈកម្មាធិការជាតិអូឡាំពិកកម្ពុជា គណៈកម្មាធិការជាតិប៉ារ៉ាឡាំពិកកម្ពុជា អគ្គនាយកដ្ឋានកីឡា អង្គភាពជំនាញ និងសហព័ន្ធកីឡាជាតិសរុបចំនួន ១៤៩នាក់។
សកម្មភាពពិធីបិទ
អគ្គនាយកខាងលើបន្តទៀតថា សិក្ខាសាលាបូកសរុបការងារអនុវិស័យអប់រំកាយ និងកីឡា មានគោលបំណង ដើម្បីពិនិត្យ និងវាយតម្លៃលើរបាយការណ៍សមិទ្ធផលអនុវិស័យអប់រំកាយ និងកីឡា ដែលបានអនុវត្តក្នុងឆ្នាំ២០២៥ និងលើកទិសដៅឆ្នាំ២០២៦ ជាពិសេសផ្តល់ឱ្យកាសដល់បណ្តារាជធានី ខេត្ត និងសហព័ន្ធកីឡាជាតិ ផ្តល់ធាតុចូលនូវបញ្ហាប្រឈម និងសំណូមពរ ដើម្បីឱ្យរបាយការណ៍លទ្ធផល និងទិសដៅអនុវិស័យបានពេញលេញ និងគ្រប់ជ្រុងជ្រោយ ព្រមទាំងឯកភាពគ្នាដាក់ចូលក្នុងសន្និបាតក្រសួងអប់រំ យុវជន និងកីឡា នាខែកុម្ភៈ ឆ្នាំ២០២៥ នាពេលខាងមុខ។
សកម្មភាពពិធីបិទ
តាមអនុសាសន៍ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡាមាន៣ចំណុចសំខាន់ៗ ទី១. ការងារអប់រំកាយនិងកីឡា ត្រូវមានចក្ខុវិស័យ និងបេសកកម្មឱ្យបានជាក់លាក់ទាំងក្នុងគ្រឹះស្ថានសិក្សារបស់សិក្សានុសិស្ស រួមទាំងសុខភាពសិក្សា និងយន្តការអប់រំកាយសម្រាប់មហាជនឱ្យស្របតាមអន្តរជាតិ ពិសេសគឺអាស៊ាន ដើម្បីប្រជាជាតិអាស៊ានទទួលបានសុខភាពល្អ ទី២.ការអភិវឌ្ឍកីឡាជំនាញ កីឡាកម្រិតខ្ពស់ ត្រូវពិនិត្យទៅលើផលប៉ះពាល់ទាំងឡាយដែលពាក់ព័ន្ធទៅនឹងស្ថាប័នដ៏ទៃទៀត និងទី៣. ការពិភាក្សាក្នុងអង្គសិក្ខាសាលាត្រូវលើកឡើងឱ្យបានច្បាស់លាស់តាមប្រធានបទ ដើម្បីស្វែងរកបញ្ហាប្រឈម និងស្វែងរកដំណោះស្រាយពិតប្រាកដ ដើម្បីធ្វើការកែលម្អ និងទទួលបានលទ្ធផលប្រសិទ្ធភាពល្អប្រសើរថែមទៀត៕
