ឆ្លងកាត់ការប្រកួតជាច្រើនសប្តាហ៍ នៅទីបំផុត ព្រឹត្តិការណ៍ប្រកួតបាល់ទាត់វិលជុំកុមារ និងយុវជន AIA–ISF Youth League ប្រចាំឆ្នាំ២០២៦ បានបញ្ចប់ដោយជោគជ័យ និងរកឃើញជើងឯកប្រចាំ ខេត្តកំពង់ធំ និងខេត្តបាត់ដំបងផងដែរ។
កម្មវិធីប្រចាំខេត្តទាំងពីរមានកីឡាករជាកុមារ និងយុវជន ៧២០ នាក់ មកពីក្រុមចំនួន ៦០ បានចូលរួមប្រកួត ដើម្បីដណ្ដើមឱកាសឈានទៅកាន់ការប្រកួតវគ្គផ្តាច់ព្រ័ត្រ AIA–ISF Youth League Grand Championship នាពេលខាងមុខនៅរាជធានីភ្នំពេញ ។
ពេញមួយរដូវកាលនេះ ព្រឹត្តិការណ៍ប្រកួតបាល់ទាត់វិលជុំកុមារ និងយុវជន AIA–ISF Youth League មិនត្រឹមតែផ្តល់ឱកាសឲ្យប្អូនៗបានចូលរួមប្រកួតប្រជែងប៉ុណ្ណោះទេ ប៉ុន្តែថែមទាំងផ្តល់ឱកាសដល់ ពួកគេកសាងទំនុកចិត្ត ភាពក្លាហាន ពង្រឹងសមត្ថភាពការងារជាក្រុម និងការទំនាក់ទំនង អភិវឌ្ឍភាព ជាអ្នកដឹកនាំ និងបង្កើតមិត្តភាព នៅក្នុងបរិយាកាសដ៏សុវត្ថិភាព មានការចូលរួម និងគាំទ្រគ្នាទៅវិញ ទៅមកទៀតផង ។
ខណៈដែលការប្រកួតវិលជុំនៅខេត្តទាំងពីរបានបញ្ចប់ ពួកគេកំពុងត្រៀមខ្លួនឡើងមកកាន់ ការប្រកួតវគ្គ ផ្តាច់ព្រ័ត្រ ISF Grand Championship នៅថ្ងៃទី៧ ខែមិថុនា ដែលក្រុមឈ្នះប្រចាំរាជធានីភ្នំពេញ ខេត្តកំពង់ធំ និងខេត្តបាត់ដំបងនឹងជួបប្រកួតគ្នាដើម្បីដណ្ដើមជើងឯកក្នុងការប្រកួតវគ្គផ្តាច់ព្រ័ត្រ AIA–ISF Youth League Grand Champions 2026 ។ ការប្រកួតនេះនឹងក្លាយជាការអបអរសាទរ ដ៏អស្ចារ្យនៃទេពកោសល្យ ការតាំងចិត្ត ស្មារតីកីឡា និងសាមគ្គីភាពសហគមន៍ ។
អ្វីដែលគួរឲ្យកត់សំគាល់ ឆ្នាំ 2026 គឺជាឆ្នាំទី១០ហើយ ដែលក្រុមហ៊ុនធានារ៉ាប់រងអាយុជីវិត និងសុខភាព អេ អាយ អេ ខេមបូឌា បានបន្តគាំទ្រដល់ការរៀបចំព្រឹត្តិការណ៍ប្រកួតបាល់ទាត់វិលជុំកុមារ និងយុវជន AIA–ISF Youth League ដែលជាសមិទ្ធផលដ៏សំខាន់មួយនៃភាពជាដៃគូដែលកសាងឡើងលើការប្តេជ្ញារួមគ្នាក្នុងការ អភិវឌ្ឍយុវជន សុខភាព និងការបង្កើតឱកាសតាមរយៈវិស័យកីឡា របស់អង្គការផ្កាយសមុទ្រ។
ក្នុងនាមជាស្ថាប័នឈានមុខគេក្នុងការលើកកម្ពស់ការរស់នៅប្រកបដោយសុខភាពល្អ និងសកម្មភាព រស់នៅប្រចាំថ្ងៃ AIA Cambodia បានបន្តប្តេជ្ញាចិត្តរយៈពេលវែង ដើម្បីជួយឲ្យប្រជាជនកម្ពុជារស់នៅកាន់តែមានសុខភាពល្អ អាយុវែង និងជីវិតកាន់តែប្រសើរ។ លីគនេះក៏គាំទ្រដល់គំនិតផ្តួចផ្តើមថ្នាក់តំបន់របស់ AIA Group “AIA One Billion” ដែលមានគោលបំណងបង្កើតផលវិជ្ជមានដល់ជីវិតមនុស្សមួយពាន់លាននាក់នៅទូទាំងអាស៊ីត្រឹមឆ្នាំ 2030 ព្រមទាំងពង្រឹងយុទ្ធនាការ “One Life, One Health” របស់ AIA Cambodia ក្រោមប្រធានបទ “Cherish it, Protect it” ផងដែរ៕
