ការប្រកួតកីឡាបាល់ទាត់ AIA-ISF Grand Championship League 2026 បានរកឃើញម្ចាស់ជើងឯកហើយ ក្រោយដំណើរការតាំងពីដើមឆ្នាំ២០២៦ ស្វែងរកជើងខ្លាំងតាមខេត្ត និង តំបន់ផ្សេងៗរួមគ្នាឡើងមកកាន់វគ្គផ្តាច់ព្រ័ត្រ ប្រជែងពានធំប្រចាំឆ្នាំមួយនេះ។
ក្រៅតែពីការរៀបចំការប្រកួតវគ្គជម្រុះ និង ឈានមកកាន់វគ្គផ្តាច់ព្រ័ត្រ ដណ្តើមពាន អ្នកស្រីជួបវិច្ឆិកា នាយិការអង្គការផ្កាយសមុទ្រ បានបង្ហាញអារម្មណ៍រីករាយ ព្រោះការប្រកួតឆ្នាំនេះមានក្រុមនារីចូលរួមច្រើន ជាពិសេសក៍មានរៀបចំឲ្យមានការប្រកួតសម្រាប់ជនពិការ វិញ្ញាសា បាល់បោះរទេះ និង បាល់ទាត់ជនពិការភ្នែកផងដែរ។
ការបញ្ចូលវិញ្ញាសាជនពិការឲ្យមាននាពេលនេះ ដើម្បីជាការលើកកម្ពស់ដល់ជនមានពិការភាព ឲ្យពួកគាត់មានឧកាសលេងកីឡា និង ចូលរួមសកម្មភាពក្នុងសង្គមដូចមនុស្សទូទៅ ជាពិសេសធ្វើឲ្យពួកគាត់មានកម្លាំងចិត្ត ធ្វើការជាច្រើនទៀត ដែលមនុស្សធម្មតាធ្វើមិនបាន។
សូមរំលឹកផងដែរថា មុននិងឈានមកកាន់ការប្រកួតដណ្តើមពានរង្វាន់ធំនេះ អង្គការផ្កាយសមុទ្រនិងដៃគូឧបតម្ភ បានរៀបំការប្រកួត ប្រកួតបាល់ទាត់វិលជុំកុមារ និងយុវជន AIA–ISF Youth League ទាំងរាជធានីភ្នំពេញ កំពង់ធំ និង បាត់ដំបង ។ ដោយក្រុមដែលឈ្នះតាមមណ្ឌលទាំងនេះ ត្រូវឡើងមកប្រជែងពានធំ គឺ បាល់ទាត់វិលជុំវគ្គផ្តាច់ព្រ័ត្រ ISF Grand Championship នេះឯង។ ការប្រកួតឆ្នាំនេះ មានក្រុមចូលរួមចំនួន១៣៥ក្រុម ។
ជាគោលបំណងក្នុងការរៀបចំការប្រកួតនេះ គឺផ្តល់ឱកាសឲ្យពួកគេបានចូលរួមប្រកួតប្រជែងដោយ មិត្តភាព និងភាពស្វិតស្វាញ ស្មារតីការងារជាក្រុម និងការកសាងមិត្តភាពថ្មីៗក្នុងបរិយាកាស ដែល មានសុវត្ថិភាព បរិយាបន្ន និងការគាំទ្រ ។ ពេញមួយរដូវកាលនេះ កីឡាករកីឡាការនីទទួលបាន អត្ថប្រយោជន៍លើសពីការប្រកួតបាល់ទាត់ មានឱកាសកសាងទំនុកចិត្តលើខ្លួនឯង ពង្រឹង ជំនាញទំនាក់ទំនង និងភាពជាអ្នកដឹកនាំ ព្រមទាំងរកឃើញអ្វីដែលពួកគេពេញចិត្ត ៕
