ទីបំផុត ក្រុមបាល់ទាត់ អគ្គស្នងការដ្ឋាននគរបាលជាតិ បានក្លាយជាម្ចាស់ជើងឯក“ពានរង្វាន់កីឡាបាល់ទាត់ក្រសួងមហាផ្ទៃ” លើកទី២ ឆ្នាំ២០២៥ ក្រោយយកឈ្នះក្រុម ម្ចាស់ជើងឯកឆ្នាំចាស់ អន្តោប្រវេសន៍មានជ័យក្នុងលទ្ធផលយ៉ាងចាស់ដៃ ៣ទល់០ នាវគ្គផ្តាច់ព្រ័ត្រកាលពីយប់ថ្ងៃទី១១មិនាឆ្នាំ២០២៥ម្សិលមិញនេះ។
ចំពោះក្លឹបខុទ្ទកាល័យឯកឧត្តមអភិសន្តិបណ្ឌិត ស សុខា ទទួលបានចំណាត់ថ្នាក់លេខ៣ ក្រោយប្រកួតវគ្គចុងក្រោយឈ្នះ ក្រុមប្រឹក្សាកីឡាក្រសួងមហាផ្ទៃ ក្នុងលទ្ធផល៣ទល់២។
មុននឹងឈានមកដល់វគ្គផ្តាច់ព្រ័ត្រនេះការប្រកួតដែលដំណើររយៈពេលជិត២ខែ ក្រុមការពារតំណែងជើងឯកឆ្នាំចាស់ គឺក្លឹបបាល់ទាត់អន្តោប្រវេសន៍មានជ័យ បានយកឈ្នះ ក្លឹបខុទ្ទកាល័យឯកឧត្តមអភិសន្តិបណ្ឌិត ស សុខា ២ទល់០ ស្របពេលដែល អគ្គស្នងការដ្ឋាននគរបាលជាតិ យកឈ្នះ ក្រុមប្រឹក្សាកីឡាក្រសួងមហាផ្ទៃ ៩ទល់៣ កាលពីល្ងាចទី០៧ ខែមីនា ឆ្នាំ២០២៥ ក្នុងវគ្គពាក់កណ្ដាលផ្ដាច់ព្រ័ត្រ ។
ដូច្នេះការប្រកួតវគ្គផ្ដាច់ព្រ័ត្រ អគ្គស្នងការដ្ឋាននគរបាលជាតិ ត្រូវជួប អន្តោប្រវេសន៍មានជ័យ ដើម្បីដណ្ដើមជើងឯក និងទម្លាក់ម្ចាស់ជើងឯកឆ្នាំចាស់បានសម្រេច ក្នុងលទ្ធផល៣-០ រីឯការប្រកួតដណ្ដើមយកលេខ៣ គឺក្លឹបបាល់ទាត់ខុទ្ទកាល័យឯកឧត្តមអភិសន្តិបណ្ឌិត ស សុខា ឈ្នះ ក្រុមប្រឹក្សាកីឡាក្រសួងមហាផ្ទៃ ។
ពិធីបិទជាផ្លូវការធ្វើឡើង ក្រោមអធិបតីភាពឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ រួមជាមួយឯកឧត្តម លោកជំទាវថ្នាក់ដឹកនាំជាច្រើនរូបទៀត។
ក្រៅតែពីក្រុមដែលទទួលចំណាត់ថ្នាក់លេខ១ដល់លេខ៣ ខាងលើ ក៍មានការប្រគល់ពានរង្វាន់ ដល់គ្រូបង្វឹកល្អជាងគេ ពាន FAIR PLAY , កីឡាករទាត់បញ្ចូលទីច្រើនជាងគេ និង ស្រោមដៃមាសជាដើម ។
សូមរំលឹកផងដែរថា “ពានរង្វាន់កីឡាបាល់ទាត់ក្រសួងមហាផ្ទៃ” លើកទី២ ឆ្នាំ២០២៥នេះ មានក្លឹបចំនួន ១៣ចូលរួម រួមមានក្លឹបមកពីបណ្ដាអគ្គស្នងការដ្ឋាន អគ្គលេខាធិការដ្ឋាន អគ្គនាយកដ្ឋាននានា ដោយចែកចេញជា ៤ពូល ក្នុង១ពូល មាន ៣ក្រុម លើកលែងតែពូល D មាន ៤ក្រុម សរុបការប្រកួតចំនួន ២៣ប្រកួត។
ជាលទ្ធផលក្រុមរងជើងឯកឆ្នាំចាស់ អគ្គស្នងការដ្ឋាននគរបាលជាតិ បានក្លាយជាម្ចាស់ជើងឯក“ពានរង្វាន់កីឡាបាល់ទាត់ក្រសួងមហាផ្ទៃ” លើកទី២ ឆ្នាំ២០២៥ ៕
