ការប្រកួតដែលអ្នកគាំទ្រគុនខ្មែរទន្ទឹងរង់ចាំនឹងមកដល់នៅថ្ងៃស្អែកនេះហើយលើទឹកដីខេត្តសៀមរាប រៀបចំដោយសង្វៀនថោន ដាក់ឲ្យ ធឿន ធារ៉ា ប៉ះ ជនជាតិអាមេរិក ដណ្ដើមខ្សែក្រវាត់ទម្ងន់ ៧៣គីឡូក្រាម។
លោក Tommy Kim តំណាងទូរទស្សន៍ថោន និងជាតំណាង IPCC ប្រចាំនៅកម្ពុជា បានឲ្យដឹងថា ចំពោះលោកផ្ទាល់មានចិត្តសប្បាយរីករាយ និងរំភើបជាខ្លាំងដែលបានរៀបចំឲ្យមហាព្រឹត្តិការណ៍គុនខ្មែរ-សហរដ្ឋអាមេរិក នៅថ្ងៃទី២៨ ខែមីនា ឆ្នាំ២០២៥ នៅលើទឹកដីដ៏បវរខេត្តសៀមរាប។
គោលបំណង នៃការរៀបចំឲ្យមានព្រឹត្តិការណ៍នេះឡើងគឺចង់ផ្សព្វផ្សាយគុនខ្មែរទៅកាន់សហរដ្ឋអាមេរិក ផ្សព្វផ្សាយវប្បធម៍ អរិយធម៌របស់ខ្មែរ ផ្សព្វផ្សាយតំបន់ទេសចរណ៍របស់កម្ពុជាទៅកាន់ពិភពលោកឲ្យបានស្គាល់ និងទាក់ទាញភ្ញៀវទេសចរណ៍មកកម្សាន្តផងដែរ។
នេះជាមោទកភាពដែលកម្ពុជាមានកំពូលកីឡាករគុនខ្មែរទាំង៥រូបប្រកួតជាមួយលំដាប់ជើងឯករបស់សហរដ្ឋអាមេរិក ប្រចាំស្ថាប័ន WCK តែម្ដង។ លោកសូមថ្លែងអំណរគុណដល់ភាគីខាងសហរដ្ឋអាមេរិកដែលបានសហការរៀបចំឲ្យការប្រកួតនេះឡើង និងបន្តសហការគ្នាថែមទៀតផ្សព្វផ្សាយគុនខ្មែរ។
តំណាងទូរទស្សន៍ថោនអំពាវនាវដល់ប្រជាជនខ្មែរសូមផ្ដល់ស្នាមញញឹម និងលើកទឹកចិត្តដល់កីឡាករកម្ពុជា និងកីឡាករអាមេរិកបើទោះជាការប្រកួតទទួលបានលទ្ធផលយ៉ាងណាក្ដី។ ការទទួលស្វាគមន៍ដល់ភ្ញៀវបែបនេះជាចំណងមិត្តភាពមួយដ៏ថ្លៃថ្លា និងជាការបង្កើនដល់សេដ្ឋកិច្ចរបស់កម្ពុជានៅពេលក្រោយទៀត។
ការប្រកួតមិត្តភាពអន្តរជាតិគុនខ្មែ-សហរដ្ឋអាមេរិក នេះធ្វើឡើងនៅឯខេត្តសៀមរាប នាថ្ងៃទី២៨ ខែមីនា ឆ្នាំ២០២៥ ស្អែកនេះ។ កីឡាករឆ្នើមរបស់កម្ពុជារួមមាន ធឿន ធារ៉ា ផល សុភ័ណ្ឌ សោម វិឆ័យ ចក់ស៊ីវិន គុនខ្មែរ និងកីឡាករ មាស ប៊ុនថេន ត្រូវប៉ះជាមួយខាងសហរដ្ឋអាមេរិក ៥នាក់ផងដែរ៕
