ស្ថានីយទូរទស្សន៍ថោន ធ្វើសន្និសីទសារព័ត៌មានប្រកាសពីការប្រកួតនៅប្រទេសចិន បារាំង ខណៈនេះជាការផ្ដល់ឱកាសដល់កីឡាករកម្រិត B បានចេញប្រកួតនៅក្រៅប្រទេសសន្សំបទពិសោធ និងពង្រឹងសមត្ថភាពឲ្យក្លាយជាកីឡាករជើងខ្លាំងនៅថ្ងៃខាងមុខ។
សកម្មភាពសន្និសីទសារព័ត៌មាន
លោក Tommy Kim ទីប្រឹក្សាស្ថានីយទូរទស្សន៍ថោន បានឲ្យដឹងក្នុងសន្និសីទសារព័ត៌មានថា ថោនតែងតែគិតគូដល់កីឡាករមិនថាលំដាប់ A ឬ B C នោះទេ ពោលផ្ដល់ឱកាសជានិច្ចដើម្បីឲ្យពួកគេបានប្រកួតអន្តរជាតិ រួមទាំងចេញទៅប្រកួតនៅក្រៅប្រទេសជាដើម។
សកម្មភាពសន្និសីទសារព័ត៌មាន
តួយ៉ាងនេះជាការផ្ដល់ឱកាសថ្មីទៀតហើយដល់កីឡាករលំដាប់ B មានឱកាសចេញទៅជាមួយលំដាប់ A ប្រកួតក្នុងកម្មវិធីនៅទីក្រុងជៀវចរ ខេត្តហឺណាន ប្រទេសចិន លើកនេះគឺដើម្បីឲ្យអ្នកមិនទាន់មានឈ្មោះល្បីទាំងនោះបានស្គាល់មជ្ឈដ្ឋានខាងក្រៅ និងភាពរីកចម្រើននៃក្បាច់គុននៅពិភពលោកផង។ បន្ថែមពីនេះជាការកសាងកេរ្តិ៍ឈ្មោះខ្លួនឯង ពង្រឹងសមត្ថភាព និងទទួលបានបទពិសោធល្អៗលើឆាកអន្តរជាតិ។ ប្រសិនបើអ្នកដែលទៅប្រកួតនៅឯក្រៅប្រទេសលើកទី១ ទទួលបានជោគជ័យហើយនោះជាកត្តាជំរុញទឹកចិត្តឲ្យពួកគេបន្តខំប្រឹងហ្វឹកហាត់ និងប្រកួតបានកាន់តែល្អ។
សកម្មភាពសន្និសីទសារព័ត៌មាន
តំណាងស្ថានីយទូរទស្សន៍ថោន និងជាស្ថាបនិកគុនខ្មែររូបនេះបានក្រើនរំលឹកដល់កីឡាករទាំងអស់ត្រូវចេះចាប់យកឱកាសល្អទាំងនេះ និងមិនធ្វេសប្រហែស ឬបណ្ដោយខ្លួនដោយមិនយកចិត្តទុកដាក់ រួមទាំងមិនខំប្រឹងប្រហែងប្រកួតនោះទេ។ ម្នាក់ៗត្រូវតែខំប្រឹងឲ្យអស់ពីសមត្ថភាពពិសេសការប្រកួតនៅប្រទេសចិន និងបារាំង នៅប៉ុន្មានថ្ងៃខាងមុខនេះ។
សកម្មភាពសន្និសីទសារព័ត៌មាន
បញ្ជាក់ដែរថា កាលពីរសៀលថ្ងៃទី២៧ ខែឧសភា ឆ្នាំ២០២៥ នេះស្ថានីយទូរទ្សន៍ថោន បានធ្វើសន្និសីទសារព័ត៌មានប្រកាសពីការបញ្ជូនកីឡាករគុនខ្មែរ ១៤រូបទៅប្រកួតនៅប្រទេសចិន និងបារាំង។ ការប្រកួតនៅប្រទេសចិននេះធ្វើឡើងនៅថ្ងៃទី30 ខែឧសភា ឆ្នាំ 2025 នៅទីក្រុងជៀវចរ ខេត្តហឺណាន ដោយមានកីឡាករ ១០រូបចូលរួម។ ចំណែកការប្រកួតនៅប្រទេសបារាំងមានកីឡាករ ៤រូបដូចជា ផល សុភ័ណ្ឌ សោម វិស័យ សាវិន គុនខ្មែរ និង សូត្រ វាសនា។ កម្មវិធីទាំងពីរនេះបានការឧបត្ថម្ភធំពីក្រុមហ៊ុន Ganzberg៕
