នៅរសៀលថ្ងៃទី៥ ខែកក្កដា ឆ្នាំ២០២៥ សហព័ន្ធខ្មែរកីឡាហាប់គីដូ សហការជាមួយសាលាបឋមសិក្សាបាក់ទូក បង្កើតក្លឹបថ្មីមួយដើម្បីជំរុញកុមារៗហាត់កីឡាដើម្បីមានសុខភាពល្អ រាងកាយរឹងមាំ និងជាធនធានសម្រាប់ប្រទេសជាតិ។
លោក សុខ គឹមសួគ៌ មានប្រសាសន៍ថា លោកមានចិត្តសប្បាយរីករាយជាខ្លាំងបន្ទាប់ពីបានសហការបង្កើតក្លឹបកីឡាហាប់គីដូសាលាបឋមបាក់ទូកចាប់ពីនេះតទៅដើម្បីជាឱកាសដល់សិស្សបានហាត់កីឡាមួយនេះ។ លោកសង្ឃឹមថាក្លឹបថ្មីនេះនឹងជួយជំរុញដល់សិស្សៗហាត់កីឡាពង្រឹងសុខភាពកាន់តែល្អ រឹងមាំ និងក្លាយជាធនធានសំខាន់លើកស្ទួយកេរ្តិ៍សាលា និងសង្គមជាតិនៅថ្ងៃខាងមុខ។
កន្លងទៅការជជែក និងគម្រោងនៃការសហការនេះមានជាយូរមកហើយ ប៉ុន្តែមិនទាន់សម្រេចដូចបំណង។ យ៉ាងណានៅពេលនេះក្លឹបកីឡាហាប់គីដូសាលាបាក់ទូកបានកកើតចេញជារូបរាងហើយ ដូច្នេះសិស្សៗដែលមានបំណងចង់ហ្វឹកហាត់អាចចាប់ចុះឈ្មោះបានពីពេលនេះតទៅ។
ក្រុមកីឡាករ កីឡាការិនីហាប់គីដូជិត២០នាក់បានសម្ដែងនូវក្បាច់ស្នៀតពិសេសៗក្នុងថ្ងៃបើកក្លឹបហាប់គីដូសាលាបឋមសិក្សាបាក់ទូកកាលពីរសៀលថ្ងៃទី៥ ខែកក្ដដា ឆ្នាំ២០២៥ នេះ។ នាពេលសម្ដែងនោះដែរមានការអញ្ជើញចូលរួមពីលោក ពុំ ណាង តំណាងសហព័ន្ធខ្មែរកីឡាហាប់គីដូ គ្រូៗ និងលោក សុខ គឹមសួគ៌ នាយកសាលា រួមទាំងសិស្សៗជាច្រើននាក់៕
