ការប្រកាសយកពន្ធ ២៥ % ថ្មីលើដែក និងអាលុយមីញ៉ូម ទាំងអស់ដែលនាំចូលទៅក្នុងទីផ្សារអាម៉េរិកបានធ្វើឱ្យប្រទេសជាច្រើនមានការភ្ញាក់ផ្អើលយ៉ាងខ្លាំង រួមទាំងដៃគូអាម៉េរិក និងសម្ព័ន្ធមិត្តនៅអឺរ៉ុបផង។ អឺរ៉ុបបានព្រមានថា នឹងចាត់វិធានការដើម្បីឆ្លើយតប។
ថ្លែងនៅក្នុងសន្និសីទសារព័ត៌មានជាទៀងទាត់ អ្នកនាំពាក្យក្រសួងសេដ្ឋកិច្ចអាល្លឺម៉ង់ លោក Korbinian Wagner បានបញ្ជាក់ថា អាល្លឺម៉ង់បានព្រមានថា ការដំឡើងពន្ធខ្ពស់នឹងបង្កគ្រោះថ្នាក់ដល់គ្រប់ភាគីទាំងអស់។ ការថ្លែងនេះធ្វើឡើងបន្ទាប់ពីប្រធានាធិបតីអាម៉េរិក លោក ដូណាល់ ត្រាំ បានប្រកាសពីផែនការដំឡើងពន្ធ ២៥ភាគរយលើផលិតផលអាលុយមីញ៉ូម និងដែកថែបនាំចូល។ ទោះជាយ៉ាងណាក៏ដោយ អាជ្ញាធរអាល្លឺម៉ង់បានបញ្ជាក់ថា ប្រទេសនេះ និងសហភាពអឺរ៉ុបនៅតែរង់ចាំការប្រកាសជាផ្លូវការអំពីពន្ធថ្មីណាមួយរបស់អាម៉េរិកទេ។
ថ្លែងទៅកាន់អ្នកសារព័ត៌មាន អធិការបតីអាល្លឺម៉ង់ អូឡាហ្វ ស្ហូល បានសង្កត់ធ្ងន់ថា ៖«រឿងមួយគឺច្បាស់ណាស់ យើងនឹងពិនិត្យមើលយ៉ាងដិតដល់នូវបញ្ហានេះ ក្នុងនាមជាសហភាពអឺរ៉ុប នៅពេលដែលវាមកដល់យើងជាផ្លូវការ។ នោះហើយជាមូលហេតុដែលយើងអាចនិយាយយ៉ាងប្រុងប្រយ័ត្នបំផុតអំពីបញ្ហានេះនាពេលនេះ នៅពេលដែលវាមិនផ្លូវការ ប៉ុន្តែមានភាពច្បាស់លាស់ទាំងស្រុង អ្នកណាដែលដាក់ពន្ធត្រូវតែរំពឹងថានឹងមានការសងសឹក»។
នាថ្ងៃដដែល រដ្ឋមន្ត្រីការបរទេសបារាំង លោក Jean-Noel Barrot បានព្រមានថា សហភាពអឺរ៉ុប (EU) នឹងសងសឹកប្រសិនបើអាម៉េរិកអនុវត្តផែនការរបស់ខ្លួនក្នុងការដាក់ពន្ធនាំចូលលើអាលុយមីញ៉ូម និងដែក។
រដ្ឋមន្ត្រីការបរទេសបារាំងបានលើកឡើងថា លោកប្រធានាធិបតី ត្រាំ បានធ្វើរឿងនេះក្នុងឆ្នាំ២០១៨ ហើយសហភាពអឺរ៉ុបបានសងសឹក។ នៅពេលសួរអំពីបញ្ជីផលិតផលដែលអាចប្រឈមនឹងពន្ធសងសឹក លោក Barrot បាននិយាយថា គណៈកម្មការអឺរ៉ុប (EC) នឹងសម្រេចលើរឿងនេះ។
ទន្ទឹមនេះ អ្នកនាំពាក្យរបស់នាយករដ្ឋមន្ត្រីអង់គ្លេស លោក Keir Starmer បាននិយាយថា អង់គ្លេសតែងតែត្រៀមខ្លួនសម្រាប់ផលប៉ះពាល់ដែលអាចកើតមាននៃគោលនយោបាយពន្ធថ្មីរបស់អាម៉េរិក។ ក្រុមហ៊ុនប្រឹក្សា UK Steel បានព្រមានថា ការដាក់ពន្ធគយណាមួយនឹងជាក្លាយមហន្តរាយដល់ឧស្សាហកម្មដែកថែប ដែលបំផ្លាញការនាំចេញដែកថែបលំដាប់ខ្ពស់ទៅកាន់អាម៉េរិក ដែលជាទីផ្សារនាំចេញធំទីពីររបស់អង់គ្លេសបន្ទាប់ពីសហភាពអឺរ៉ុប។ បច្ចុប្បន្នអង់គ្លេសបាននាំចេញដែកថែបប្រហែល ២០ម៉ឺនតោនក្នុងមួយឆ្នាំទៅកាន់អាម៉េរិក ដែលមានតម្លៃជាង ៤០០លានផោន ស្មើនឹង ៩៩៥លានដុល្លារ។
យោងតាមអ្នកវិភាគ ជម្លោះពាណិជ្ជកម្មរវាងអឺរ៉ុប និងអាម៉េរិក ត្រូវបានគេរំពឹងថា នឹងធ្វើឱ្យទស្សនវិស័យ អតិផរណារបស់តំបន់ចាយប្រាក់អឺរ៉ូ កាន់តែមានភាពមិនប្រាកដប្រជា។
ថ្លែងនៅក្នុងកិច្ចប្រជុំជាមួយសមាជិកសភាអឺរ៉ុបកាលពីថ្ងៃទី១០ ខែកុម្ភៈ ប្រធានធនាគារកណ្តាលអឺរ៉ុបលោក Christine Lagarde បានលើកឡើងថា៖«អតិផរណានឹងត្រឡប់ទៅគោលដៅរយៈពេលមធ្យមរបស់យើង ២ភាគរយនៅឆ្នាំ ២០២៥។ វាច្បាស់ណាស់ថាភាពតានតឹងកាន់តែខ្លាំងនៅក្នុងពាណិជ្ជកម្មពិភពលោកនឹងធ្វើឱ្យទស្សនវិស័យអតិផរណាសម្រាប់តំបន់អឺរ៉ូកាន់តែមានភាពមិនច្បាស់លាស់។»។
កន្លងមក ប្រធានាធិបតីអាម៉េរិក លោក ដូណាល់ ត្រាំ បាននិយាយថា លោកនឹងប្រកាសពន្ធ២៥ភាគរយថ្មីលើដែក និងអាលុយមីញ៉ូមទាំងអស់ដែលនាំចូលមកទីផ្សារអាម៉េរិកដែលចូលជាធរមាននៅថ្ងៃទី៤ ខែមីនា តទៅ។ អំឡុងអាណត្តិមុន លោក ត្រាំ បានដាក់ពន្ធ ២៥ភាគរយលើដែកនាំចូល និង ១០ភាគរយលើអាលុយមីញ៉ូមនាំចូល ដោយលើកឡើងពីហេតុផលសន្តិសុខជាតិ៕
អត្ថបទ Thmey Thmey
