តំណាងស្ថានីយទូរទស្សន៍ថោន (TOWN) បានបញ្ជាក់ថា តបតាមសំណូមពរមួយចំនួនចង់ឲ្យមានការប្រកួតថ្នាលដើម្បីបន្តវេនកីឡាករចាស់ៗ ឥលូវនេះខាងលោក និងម្ចាស់ឧបត្ថម្ភ DRAGON បង្កើតហើយនៅសប្ដាហ៍នេះចាំមើលមានអ្នកគាំទ្រទេ ឬថាបានតែមាត់។
ឯកឧត្ដម ហាក់ សុខហេង នាយកគ្រប់គ្រងការផ្សាយរបស់ស្ថានីយទូរទស្សន៍ថោន (TOWN)បានឲ្យដឹងថា កន្លងទៅមានអ្នកគាំទ្រមួយចំនួនបានសំណូមពរដល់ខាងស្ថានីយឲ្យបង្កើតការប្រកួតថ្នាលដើម្បីត្រៀមស្នងកីឡាករចាស់ៗនាពេលបច្ចុប្បន្ននេះ។ ព្រោះឃើញភាគច្រើនមានតែកម្មវិធីសម្រាប់កីឡាករឈុតធំៗ។
ឯកឧត្ដមលើកឡើងចំៗទៅកាន់អ្នកគាំទ្រថា ឥលូវនេះខាងស្ថានីយបានបំពេញបំណង Fan ហើយ ដូច្នេះចាំមើលមានអ្នកទៅទស្សនា ឬគាំទ្រតាមការ Live ទេ។ កុំនិយាយបានតែមាត់ សំណូមពរឲ្យមានហើយ ប៉ុន្តែខ្លះមិនគាំទ្រ និងជួយលើកស្ទួយឲ្យសោះ។
នាយកគ្រប់គ្រងការផ្សាយបន្ថែមទៀតថា ដើម្បីឲ្យកីឡាករ កីឡាការិនី គុនខ្មែរមានចំនួនកាត់តែច្រើន និងសំបូរកម្មវិធីថ្នាល លុះត្រាតែអ្នកគាំទ្រងាកមកជួយគាំទ្រ ជួយលើកស្ទួយទាំងអស់គ្នា ដូចការប្រកួតឈុតធំដែរទើបកម្មវិធីសម្រាប់ថ្នាលទាំងនោះអាចបន្តដំណើរទៅមុខបានទៀត។
ឯកឧត្ដមសូមថ្លែងអំណរគុណដល់ DRAGON Beer ដែលបានឧបត្ថម្ភគាំទ្រឲ្យបង្កើតកម្មវិធីប្រដាល់ថ្នាល Dragon Kunkhmer ចាប់ពីថ្ងៃទី១ ខែមីនា ឆ្នាំ២០២៥ នេះតទៅ ដែលនេះជាការផ្ដល់ឱកាសដល់យុវជនក្មេងៗបានបញ្ចេញសមត្ថភាព សន្សំបទពិសោធ ឆ្ពោះទៅបន្តវេនរៀមច្បងនៅថ្ងៃខាងមុខ។
បញ្ជាក់ដែរថា ស្ថានីយទូរទស្សន៍ថោន (TOWN) រួមជាមួយសហព័ន្ធប្រដាល់គុនខ្មែរ និងម្ចាស់ឧបត្ថម្ភ Dragon Beer បានធ្វើសន្និសីទសារព័ត៌មានកាលពីថ្ងៃទី២៧ ខែកុម្ភៈ ឆ្នាំ២០២៥ ប្រកាសបើកកម្មវិធីប្រដាល់ថ្នាល Dragon Kunkhmer។ ការប្រកួតដំបូងនៅថ្ងៃទី១ ខែមីនា ឆ្នាំ២០២៥ នេះមានជាការប្រកួតមិត្តភាពគូពិសេសៗផង និងមានការប្រកួតម៉ារ៉ាតុងដណ្ដើមខ្សែក្រវាត់ទម្ងន់ ៥២ គីឡូក្រាមផង។ គូដណ្ដើមខ្សែក្រវាត់រួមមានកីឡាករ ឡុង ពិសិដ្ឋ ឡៅ សៃណេត រស្មី គុនខ្មែរ ធន់ វិស្នុ។ ការប្រកួតនេះចាប់ផ្ដើមពីម៉ោង ៨យប់តទៅនៅទីតាំង ដីឡូត៍វត្តស្ងួនពេជ្រ ខណ្ឌកំបូល រាជធានីភ្នំពេញ៕
