ក្រោយពិធីបើកជាផ្លូវការកាលពីចុងសប្តាហ៍កន្លងមកនេះ នៃព្រឹត្តការណ៍ប្រកួតកីឡាសិស្សបឋមសិក្សាជើងឯកថ្នាក់ជាតិប្រចាំឆ្នាំ២០២៥ ក្រោមប្រធានបទ ៖ “កីឡាដើម្បីសុខភាព សិក្សា” គិតមកត្រឹមពេលនេះមានកីឡាចំនួន២ប្រភេទបានបញ្ចប់ការប្រកួតរបស់ខ្លួនរួចរាល់ហើយ ខណៈកីឡាចំនួន១១ប្រភេទទៀតកំពុងមមាញឹកនៅក្នុងការប្រកួតរបស់ខ្លួនទៅតាមទីលានដែលបានកំណត់របស់ក្រសួង។
សម្រាប់ប្រភេទកីឡាចំបាប់បានបញ្ចប់ការប្រកួតរបស់ខ្លួនជាផ្លូវការហើយ ដោយក្នុងពិធីបិទនាពេលនោះ មានការចូលរួមពីលោកព្រឹទ្ធាចារ្យ ស៊ឹម ទូច , លោកព្រឹទ្ធាចារ្យ ហុក ឈាងគីម និងលោក ផាត់ បញ្ញាសុជាតក៍ អនុប្រធានមជ្ឈមណ្ឌលជាតិ ហ្វឹកហ្វឺនកីឡា រួមជាមួយមន្រ្តីជាច្រើនរូបទៀត។
ប្រភេទកីឡានេះមានក្រុមកីឡាករ-កីឡាករចូលរួមចំនួន ៤៣ នាក់ ក្នុងនោះកីឡាការិនី ២១ នាក់មកពីរាជធានី ខេត្តចំនួន១១ ដូចជា ៖ ភ្នំពេញ ខេត្តកំពង់ស្ពឺ ខេត្តព្រៃវែង ខេត្តតាកែវ ខេត្តពោធិ៍សាត់ ខេត្តកំពង់ឆ្នាំង ខេត្តកណ្តាល ខេត្តមណ្ឌលគិរី ខេត្តកំពត ខេត្តកំពង់ចាម និងខេត្ត ។
ជាលទ្ធផល ក្រុមកីឡាករ-កីឡាករចំបាប់ ខេត្តពោធិ៍សាត់ ដណ្តើមបានមេដាយមាស ២ គ្រឿង និងមេដាយប្រាក់ ១ គ្រឿង , ខេត្តកំពង់ឆ្នាំង ដណ្តើមបានមេដាយមាស ១ ប្រាក់ ១ និងមេដាយសំរិទ្ធ ១ គ្រឿង, ខេត្តកណ្តាល ដណ្តើមបានមេដាយមាស ១ និងមេដាយសំរិទ្ធ ១ គ្រឿង និងក្រុមកីឡាករ-កីឡាករចំបាប់ ខេត្តមណ្ឌលគិរី ដណ្តើមបាន មេដាយប្រាក់ ១ គ្រឿង និងមេដាយសំរិទ្ធ ១ គ្រឿង។
សូមបញ្ជាក់ថា ការប្រកួតកីឡាសិស្សបឋមសិក្សាថ្នាក់ជាតិឆ្នាំ២០២៥ មាន ១៣ប្រភេទ និង ៦៨វិញ្ញាសា ក្រោមប្រធានបទ “កីឡាដើម្បីសុខភាពសិក្សា” ដែលមានប្រតិភូកីឡាមកពី ២៥រាជធានី-ខេត្ត ចំនួនប្រមាណ ៣ ០២៦នាក់ ចូលរួមប្រកួត។ ការប្រកួតប្រព្រឹត្តទៅចាប់ពីថ្ងៃទី០២ ដល់ថ្ងៃទី១១ ខែឧសភា ឆ្នាំ២០២៥ នៅរាជធានីភ្នំពេញ ។
ក្នុងចំណោម ១៣ ប្រភេទកីឡារួមមាន៖ បាល់ទាត់ បាល់ទះ បាល់បោះ អត្តពលកម្ម វាយសី វាយកូនឃ្លីលើតុ តេក្វាន់ដូ WT តេក្វាន់ដូ ITF ប៊ូល និងប៉េតង់ គុនល្បុក្កតោ ហែលទឹក គុនដាវ និងចំបាប់ ៕
