លោក រិន សុភ័ក្ត ដែលមានពិការភាពផ្នែកជើង និងកំពុងអង្គុយលើរទេះ លើកឡើងថាវត្តមានរបស់អង្គការ PAfiD គឺពិតជាមានសារសំខាន់ និងជួយជនមានពិការភាពឲ្យក្លាហានក្រោកឈរបន្តដំណើរទៅមុខទៀតក្នុងសង្គមជាតិ។
លោក រិន សុភ័ក្ត បានឲ្យដឹងក្នុងថ្ងៃពិព័រណ៍ការងារ និងផលិតភាព ឆ្នាំ២០២៤ ថាលោកក៏បានមកចូលរួមដាក់ពាក្យស្វែងរកការងារធ្វើជាមួយមហាជនផ្សេងៗទៀតផងដែរ ពិសេសនៅស្តង់របស់អង្គការ PAfiD តែម្ដង។ ក្នុងឱកាសនោះផងដែរគឺរូបគេបានដាក់ពាក្យផ្នែកជំនួយការរដ្ឋបាល និងគណៈនេយ្យ។
បុរសសម្បុលស្រអែម និងកំពុងអង្គុយលើរទេះរុញខាងលើនេះលើកឡើងទៀតថា បានជារូបគេមកកាន់ស្ដង់របស់អង្គការ PAfiD ដោយសារតែអង្គការនេះបានជួយសម្របសម្រួល CV ឲ្យបានល្អត្រឹមត្រូវ និងចាត់ចែងដាក់ពាក្យទៅតាមកន្លែងសមស្របជាមួយសមត្ថភាព ភាពជាក់ស្ដែងរបស់ជនមានពិការភាព។ ក្រៅតែការពីជួយដល់ជនមានពិការភាពទទួលឱកាសការងារហើយនោះ ពោល PAfiD ពិតជាមានសារសំខាន់ណាស់ក្នុងការលើកទឹកចិត្តតម្រង់ទិស និងជំរុញដល់ការចាប់អាជីពពិកប្រាកដណាមួយដើម្បីមានសមត្ថភាពបំពេញការងារតាមស្ថាប័ន ឬក្រុមហ៊ុន អង្គការផ្សេងៗ។
អ្នកខេត្តកំពង់ឆ្នាំងរូបនេះថ្លែងដោយការពេញចិត្ត និងសប្បាយរីករាយទៀតថា អង្គការ PAfiD ជាអ្នកជំរុញលើកទឹកចិត្តដល់ជនមានពិការភាពឲ្យមានភាពក្លាហាន និងក្រោកឈរបន្តដំណើររស់នៅជាមួយមហាជនធម្មតាទូទៅដោយទំនុកចិត្តខ្ពស់ រួមទាំងផ្ដល់តម្លៃ និងជឿជាក់លើខ្លួនឯង។
បញ្ជាក់ដែរថា នៅក្នុងពិធីពិព័រណ៍ការងារ និងផលិតភាព ឆ្នាំ២០២៤ ដែលមានចម្រុះស្ថាប័ន ក្រុមហ៊ុនរហូត ១៥០ និងការផ្ដល់ឱកាសការងារជាង ៣ម៉ឺនកន្លែងដែលទើបញ្ចប់ទៅថ្មីៗនេះក៏មានអង្គការ PAfiD ដាក់ស្តង់ផងដែរដើម្បីជួយសម្រួលដល់ជនមានពិការភាពមកផងដែរ។ ពិព័រណ៍ការងារនេះផងដែរគឺបានធ្វើឡើងនៅឯសាលកោះពេជ្ររយៈពេល ២ថ្ងៃ ដោយមានការចូលរួមជាច្រើនពីសំណាក់យុវជន សិស្សនិស្សិត រួមទាំងជនមានពិការភាពទៀតផង៕
