ពានរង្វាន់បាល់ទាត់របស់ក្រសួងមហាផ្ទៃ លើកទី២ នឹងចាប់ផ្ដើមពីថ្ងៃទី១៦ ខែមករា ឆ្នាំ២០២៥ ស្អែកនេះហើយនៅពហុកីឡដ្ឋានជាតិ ខណៈក្លឹបបាល់ទាត់អគ្គស្នងការដ្ឋាននគរបាលជាតិ អគ្គនាយកដ្ឋាន អគ្គលេខាធិការដ្ឋាន ចំណុះក្រសួងមហាផ្ទៃទាំង ១៣ ក៏ត្រៀមខ្លួនរួចរាល់ផងដែរ។
ការចាប់ឆ្នោតបែងចែកពូលក៏បានធ្វើរួចរាល់ហើយគឺរង់ចាំតែការប្រកួតមកដល់ប៉ុណ្ណោះ ក្នុងការប្រកួតនេះចែកចេញជា ៤ពូល ក្នុងពូល A-B-C មាន ៣ ក្រុម ចំណែកពូល D ចុងក្រោយមាន ៤ ក្រុម ។ ក្រុមទាំងអស់នឹងត្រូវប្រកួតសន្សំពិន្ទុក្នុងពូលដើម្បីឡើងទៅជុំទី២ នៃការប្រកួតបន្តទៀត។
ថ្លែងក្នុងពិធីចាប់ឆ្នោតចែកពូល ឯកឧត្ដម សរ សិទ្ធិ ប្រធានគណៈកម្មការរៀបចំការប្រកួត បានឲ្យដឹងថា ការរៀបចំឲ្យមានជាការប្រកួតពានរង្វាន់ក្រសួងមហាផ្ទៃនេះឡើយក្រោមអនុសាសន៍របស់ឯកឧត្ដមអភិសន្តិបណ្ឌិត ស សុខា ដើម្បីបង្កើនភាពស្និទ្ធស្នាលរវាងមន្ត្រីក្នុងក្របខណ្ឌនគរបាល និងជាការជំរុញឲ្យមន្ត្រីៗងាកមកលេងកីឡាដើម្បីថែរក្សាសុខភាពផងដែរ។
ជាមួយគ្នានោះដែរប្រធានគណៈកម្មការរៀបចំការប្រកួតបានថ្លែងអំណរគុណដល់អគ្គនាយកដ្ឋាន អគ្គលេខាធិការដ្ឋានទាំង ១៣ ដែលបានរៀបចំឲ្យមានធនធានជាកីឡាករមកចូលរួមប្រកួតប្រជែងក្នុងរដូវកាលថ្មីនេះ។ សម្រាប់អគ្គនាយកដ្ឋាន អគ្គលេខាធិការដ្ឋាន ដែលមិនទាន់មានរៀបចំក្រុមសូមគិតគូរនៅឱកាសក្រោយៗពិសេសមិនត្រឹមតែកីឡាបាល់ទាត់នោះទេ ពោលកីឡាផ្សេងៗទៀតដូចជា វាយសី វាយកូនឃ្លីលើតុ តេក្វាន់ដូ ជាដើមដើម្បីពិនិត្យបង្កើតជាពានរង្វាន់ថ្មីផង និងមានឱកាសប្រកួតក្របខណ្ឌប៉ូលីសអន្តរជាតិផង។
ពិធីបើកការប្រកួតនេះនឹងធ្វើឡើងនៅថ្ងៃស្អែកនេះហើយចាប់ពីម៉ោង ៥.៣០ នាទីតទៅនៅពហុកីឡដ្ឋានជាតិ ក្នុងនោះការប្រកួតបើកឆាកជាការប៉ះគ្នារវាងក្រុមអគ្គស្នងការនគរបាលជាតិ និង បណ្ឌិត្យសភានគរបាលកម្ពុជា ។ ពិធីបើកការប្រកួតនេះមានការអញ្ជើញចូលរួមក្រោមអធិបតីភាពឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ៕
