គណៈកម្មាធិការជាតិអូឡាំពិកកម្ពុជា (NOCC) នាថ្ងៃទី២៧មិនាឆ្នាំ២០២៥ម្សិលមិញនេះ បានរៀបចំ មហាសន្និបាតបូកសរុបការងារ ឆ្នាំ២០២៤ និងទិសដៅការងារ ឆ្នាំ២០២៥ ដោយមានការចូលរួមជាសក្ខីភាពពីតំណាងក្រសួងអប់រំ យុវជន និងកីឡា ព្រមទាំងថ្នាក់ដឹកនាំ និងតំណាងសហព័ន្ធកីឡាជាតិនានា។
មានប្រសាសន៍ក្នុងពិធី ឯកឧត្តមបណ្ឌិត ថោង ខុន ទេសរដ្ឋមន្ត្រីទទួលបន្ទុកជំរុញអភិវឌ្ឍចលនាកីឡា និងជាប្រធាន NOCC ឲ្យដឹងថា ការរៀបចំមហាសន្និបាតនេះ គឺដើម្បីរំលេចឡើងនូវសមិទ្ធផលនានា ដែលសម្រេចបានតាមរយៈការខិតខំប្រឹងប្រែងរបស់មហាគ្រួសារចលនាអូឡាំពិក និងកីឡាជាតិកន្លងមក ហើយត្រូវបន្ដសម្លឹងទៅមុខឆ្ពោះទៅបំពេញបេសកកម្មថ្មីៗបន្ថែមទៀតរបស់ចលនាអូឡាំពិកជាតិ ក៏ដូចវិស័យកីឡាជាតិ។
ឯកឧត្តមបណ្ឌិត ថោង ខុន មានប្រសាសន៍ថា ៖«NOCC បានដើរតួនាទីយ៉ាងសំខាន់ក្នុងការចូលរួមកសាងអភិវឌ្ឍចលនាអូឡាំពិក និងវិស័យកីឡាជាតិ ជាមួយសសរស្តម្ភសំខាន់ទាំងបីគឺ NOCC ក្រសួងអប់រំ យុវជន និងកីឡា និងសហព័ន្ធកីឡាជាតិ។ ដូចនេះ ដើម្បីជំរុញយន្តការគ្រប់គ្រងដឹកនាំ និងអនុវត្តការងារកីឡាបានជោគជ័យត្រូវការ ស្មារតីរួមគិត រួមធ្វើ រួមទទួលខុសត្រូវ និងធ្វើការជាមួយគ្នាក្នុងសុខដុមរមនាការងាររបស់សសរស្តម្ភទាំងបី ដែលជាមូលដ្ឋានគ្រឹះនៃជោគជ័យក្នុងការអភិវឌ្ឍសក្តានុពលភាពវិស័យកីឡាជាតិ»។
ក្នុងនាមចលនាអូឡាំពិកកម្ពុជា ឯកឧត្តមបណ្ឌិត ថោង ខុន បានវាយតម្លៃខ្ពស់ និងថ្លែងអំណរគុណដល់ប្រព័ន្ធការងារកីឡាដែលបានប្រទាក់ក្រឡាគ្នាធ្វើកិច្ចសហការគ្នាល្អ និងយ៉ាងជិតស្និទ្ធ ដោយតម្កល់ឧត្តមគតិកីឡាជាតិ និងប្រទេសជាតិជាធំរបស់សសរស្តម្ភទាំងបីធ្វើឱ្យព្រឹត្តិការណ៍ប្រកួតកីឡាទាំងកម្រិតជាតិ និងអន្តរជាតិទទួលបានជោគជ័យដ៏ត្រចះត្រចង់ ក្រោមម្លប់សន្ដិភាព ស្ថិរភាពនយោបាយ សន្តិសុខ សណ្តាប់ធ្នាប់ សុវត្ថិភាពសង្គម ទើបយើងអាចមានឱកាសបង្កើតព្រឹត្តិការណ៍ជាតិជាប្រវត្តិសាស្ត្របានជោគជ័យជាបន្តបន្ទាប់ស្របទៅនឹងបាវចនា «កីឡារស់ក្នុងសន្តិភាព»។
សូមជំរាបដែរថា នៅក្នុងអង្គមហាសន្និបាតខាងលើ ក្រៅតែពីប្រសាសន៍សំខាន់ៗរបស់ឯកឧត្តម បណ្ឌិត ថោង ខុន ក៍មាននូវការធ្វើបទបង្ហាញនិងរបាយការណ៍ជាច្រើន។ដោយក្នុងនោះ លោកជំទាវ កុយ ពិសី ធ្វើរបាយការណ៍គណៈកម្មការសមធម៍ស្រ្តី , ឯកឧត្តម វេជ្ជបណ្ឌិត សុខសារឿន របាយការណ៍គណៈកម្មាការវេជ្ជសៈកីឡា , លោកហែមគីរី របាយការណ៍គណៈកម្មការអត្តពលិក , ឯកឧត្តម លីកុសល របាយការណ៍គណៈកម្មាការហិរញវត្ថុ , ឯកឧត្តម វ៉ាត់ ចំរើន របាយការណ៍សង្ខេប និង លើកទិសដៅឆ្នាំ២០២៥, បទបង្ហាញ AI ដោយ ឯកឧត្តម ប៊ុយសុភ័ណ្ឌ និង ឯកឧត្តម ញ៉ាន សុខវិសាល ប្រធាននាយកដ្ឋានកម្មវិធីពហុកីឡា នៃគណៈកម្មាធិការជាតិអូឡាំពិកកម្ពុជា បានឡើងធ្វើបទបង្ហាញពីប្រធានបទ ការត្រៀមស៊ីហ្គេម លើកទី៣៣ ឆ្នាំ២០២៥ ជាដើម ៕ រូបភាព ៖ nocc
