បង្កើតមកជាច្រើនឆ្នាំនៅក្នុងប្រទេសកម្ពុជា សហព័ន្ធកីឡាហាប់គីដូកម្ពុជា បានរក្សាជំហររបស់ខ្លួនរឹងមាំ ដើម្បីមានវត្តមាននៅកម្ពុជា បន្តទៀត។ ជាក់ស្តែងប៉ុន្មានឆ្នាំចុងក្រោយនេះ ក្រោយមានការចូលរួមឧបត្ថម្ភគាំទ្រពីដៃគូសហការ ពិសេសក្រុមហ៊ុន ឡារីតា បានធ្វើឲ្យហាប់គីដូកម្ពុជា ទទួលបានភាពកក់ក្តៅនិង ចេញទៅប្រកួតលើឆាកអន្តរជាតិព្រមជាមួយការឈ្នះមេដាយជាច្រើនគ្រឿង។
ផ្តល់សម្ភាសន៍ក្រោយពេលបិទបញ្ចប់កម្មវិធីប្រកួតជ្រើសរើសជើងឯកថ្នាក់ជាតិលើកទី២ ប្រចាំឆ្នាំ២០២៤នាពេលថ្មីៗនេះ លោក មឿន សម្បត្តិ អ្នកគ្រប់គ្រងទូទៅ ក្រុមហ៊ុនដឹកអ្នកដំណើរ ឡារីតាបានបង្ហាញពីការប្តេជ្ញាខ្ពស់ថា ក្រុមហ៊ុនរបស់លោកនឹងបន្តការគាំទ្រ ក្នុងការជំរុញដល់ដំណើរការអភិវឌ្ឍជំនាញកីឡារបស់កម្ពុជាមួយនេះឱ្យកាន់តែរីកចម្រើន។
នៅក្នុងរយៈពេលប្រមាណ៤ឆ្នាំនេះ ក្រុមហ៊ុនឡានឡារីតា បានដើរតួនាទីយ៉ាងសំខាន់ ក្នុងការជួយជ្រោមជ្រែងដល់សហព័ន្ធខ្មែរកីឡាហាប់គីដូ ធ្វើឱ្យសហព័ន្ធដែលត្រូវបានបង្កើតឡើងក្នុងឆ្នាំ២០០១មួយនេះ អាចមានលទ្ធភាពរៀបចំការប្រកួតជ្រើសរើសជើងឯកថ្នាក់ជាតិ ជាលើកដំបូង កាលពីឆ្នាំ២០២៣ និងបានបន្តរៀបចំការប្រកួតថ្នាក់ជាតិ លើកទី២ ឆ្នាំ២០២៤ ដែលទើបបានបញ្ចប់ដោយជោគជ័យ កាលពីថ្ងៃទី២២ ខែធ្នូ។
បន្ថែមលើនេះ ឡារីតា ក៏បានរួមចំណែកជួយឱ្យក្រុមអត្តពលិកកីឡាហាប់គីដូកម្ពុជា ចេញទៅចូលរួមការប្រកួត World I.H.F Hapkido Championship 2024 នៅប្រទេសថៃ ជាលើកដំបូងផងដែរ ហើយតាមរយៈការប្រកួតកាលពីខែសីហានោះ ក្រុមហាប់គីដូ បានបង្កើតប្រវត្តិសាស្រ្តថ្មី ដោយដណ្តើមបានមេដាយមាស១២ ប្រាក់១៣ និងសំរឹទ្ធ១៥ សម្រាប់ការទទួលបានឱកាសចេញទៅប្រកួតនៅលើឆាកអន្តរជាតិ ជាលើកដំបូងរបស់ពួកគេ។
គួរបញ្ជាក់ថា ការប្រកួតកីឡាហាប់គីដូ ជើងឯកថ្នាក់ជាតិ លើកទី២ ឆ្នាំ២០២៤ មានប្រតិភូ គ្រូបង្វឹក កីឡាករ កីឡាការិនីចូលរួមប្រកួតប្រជែងមេដាយចំនួន ៨៧នាក់ ក្នុងនោះមានកីឡាករ កីឡាការិនី ៦៧នាក់ (កីឡាការិនី ២៧នាក់) ក្រោមការរៀបចំ និងចំណាយថវិកាផ្ទាល់ខ្លួនរបស់សហព័ន្ធខ្មែរកីឡាហាប់គីដូ និងក្រុមហ៊ុនដៃគូអភិវឌ្ឍមួយចំនួន ដោយក្រុមហ៊ុន ឡារីតា ជាម្ចាស់ឧបត្ថម្ភធំ។
ការប្រកួតនេះមាន២៥វិញ្ញាសា ហើយលទ្ធផលជ័យលាភី រួមមាន៖ ចំណាត់ថ្នាក់លេខ១ ក្លឹបក្រសួងមហាផ្ទៃ មេដាយសរុប ២៦គ្រឿង ក្នុងនោះមេដាយមាស ១២ ប្រាក់៧ និងសំរឹទ្ធ៧, ចំណាត់ថ្នាក់លេខ២ ក្លឹបធីណា មេដាយសរុប ២២គ្រឿង មានមាស ៥ ប្រាក់៩ និងសំរឹទ្ធ៨, លេខ៣ ក្លឹបអូឡាំពិក មេដាយសរុប១៨ មានមាស៤ ប្រាក់៣ និងសំរឹទ្ធ១១, លេខ៤ ក្លឹបម៉ាស្ទ័រសេង មេដាយសរុប១៦គ្រឿង មានមាស ៣ ប្រាក់២ និងសំរឹទ្ធ១១ ខណៈលេខ៥ ក្លឹបឥន្ទ្រីយ៍ មេដាយសរុប១០ មានមាស១ ប្រាក់៤ និងសំរឹទ្ធ៥គ្រឿង។
គួរំលឹកដែរថា ក្រុមហ៊ុនដឹកអ្នកដំណើរ ឡារីតា តែងតែចូលរួមឧបត្ថម្ភគាំទ្រគ្រប់សកម្មភាពកីឡាហាប់គីដូកម្ពុជា ក្នុងនោះមានដូចជាការប្រកួតជើងឯកថ្នាក់ជាតិ លើកទី១ កាលពីឆ្នាំ២០២៣ កន្លងទៅ និងការប្រកួតជើងឯកថ្នាក់ជាតិ លើកទី២ ឆ្នាំ២០២៤ ក៏ដូចជាឧបត្ថម្ភគាំទ្រដល់កីឡាករ កីឡាការិនីជម្រើសជាតិ ដែលបានចេញទៅប្រកួតកីឡាហាប់គីដូ ជើងឯកពិភពលោក ឆ្នាំ២០២៤ នៅប្រទេសថៃ ដោយដណ្តើមបានសមិទ្ធផលធំធេងជូនជាតិ ដោយឈ្នះមេដាយសរុប ៤០គ្រឿងផងដែរ៕
