តំណាងសហព័ន្ធទោចក្រយានកម្ពុជា ថាការប្រកួតជើងឯកថ្នាក់ជាតិនៅខេត្តកំពតដែលទើបបញ្ចប់ទៅនេះគឺទីតាំងប្រកួត រួមទាំងការយកចិត្តទុកដាក់ពីរដ្ឋបាលខេត្ត កងកម្លាំង ជាខ្លាំងអំណោយផលដល់ការប្រកួតល្អ។
លោក នូ ចំរើន អគ្គលេខាធិការសហព័ន្ធកីឡាទោចក្រយាន បានឲ្យដឹងថា ការប្រកួតជើងឯកថ្នាក់ជាតិ ឆ្នាំ២០២៤ ដែលរៀបចំលើកទី១ នៅឯខេត្តកំពត នេះគឺរលូន និងអំណោយផលជាខ្លាំង។ រដ្ឋបាលខេត្តសហការ និងយកចិត្តទុកដាក់ជាខ្លាំង ខណៈកងកម្លាំងបានបិទផ្លូវសម្រួលដល់កីឡាករ កីឡាការិនី ប្រកួតដោយទំនុកចិត្តប្រកបដោយសុវត្ថិភាព។
អគ្គលេខាធិការខាងលើបន្ថែមទៀតថា ដោយសារឆ្នាំនេះវិញ្ញាសា(ផ្លូវប្រកួត)មានការលំបាកខ្លាំងនាំឲ្យការចូលរួមពីបណ្ដាក្លឹបមានការថយចុះជាងឆ្នាំមុនៗ។ ចំពោះសមត្ថភាពវិញក្រុមជម្រើសជាតិមានការរីកចម្រើនគួរឲ្យកត់សម្គាល់។ ប្រកួតជើងឯកថ្នាក់ជាតិនេះដែរជាការវាសស្ទង់សមត្ថភាពក្រុមជម្រើសជាតិដើម្បីត្រៀមសម្រាប់ស៊ីហ្គេម លើកទី៣៣ ឆ្នាំ២០២៥ នេះនៅឯប្រទេសថៃផងដែរ។
បញ្ជាក់ដែរថា សហព័ន្ធកីឡាទោចក្រយានកម្ពុជា បានធ្វើការប្រកួតជើងឯកថ្នាក់ ប្រចាំឆ្នាំ២០២៤ នៅឯខេត្តកំពត កាលពីថ្ងៃទី២៤ ដល់ ២៦ ខែមករា ឆ្នាំ២០២៥។ ការប្រកួតនេះផងដែរក៏មានការជួយឧបត្ថម្ភពីក្រុមហ៊ុនឯកជនដូចជា ភេសជ្ជៈ Zummer ទឹកប្រទាលកន្ទុយក្រពើ និង Miracle city world group៕
